港楊回憶，樂趣無窮！

今日輪到妹妹返學，我只能送佢返學，其他全部靠姐姐啦！所以話，小朋友點會親媽媽多呢？一定係親工人姐姐，因為乜嘢活動都係姐姐同佢一齊去！

今日返學前影的學生相，超SWEET！

妹妹返埋今個星期，就會結束係德福的幼兒園生活，本應返埋星期五(明天)，但突如期來的風球(三號)，也許令到佢明天唔使返，OH，無咗LAST DAY，仲諗住幫佢同許老師影番張相添，咁就無啦！

今日係婷婷學校的親子運動日，以前卓希都試過，但無今次咁大型。首先就係表演先，然後才和家長玩兩個遊戲，重點係大家可以開開心心咁玩！

感謝天父，讚美天父，天父的恩典真是夠我們每一個人用的！婷婷妹妹入到禮賢幼稚園啦，以後兩兄妹同一間學校！

終於了咗件心事，婷婷妹妹in咗禮幼啦！我自己覺得佢的表現無係靈糧幼稚園咁好，又唔舉手答問題，老師俾禮物又唔講多謝，走時又唔同老師講再見！無分啦！無分啦！上次靈糧堂時佢都識，今日就乜都無做！不過，也許同坐係佢隔離個個小朋友影響有關，隔離嗰個小朋友直頭唔肯坐之餘，仲企咗係張椅到，又嘈吵，吵到連我都要按住隻耳仔先聽到老師所講的嘢！仲有就係個D家長好緊張(我去之前都好緊張！)老師一問問題，家長答先過小朋友，係咁講咗個答案俾個小朋友然後要佢答，所以唔使我出聲，妹妹都聽到哂個答案！

去的時候，多咗一個插曲，就係我哋差D遲到！四時我哋已經出發，但係原來好好好好塞車，係車到用IPHONE睇交通的APPS，佢就咁講：

「16:14  太子道西去旺角交通意外，近嘉道理的交通意外仍未清理。」

咁我就好後悔唔行龍翔道去，點知係下面個通知就係講龍翔道：

「15：11  觀塘道去龍翔道，近坪石對開有交通意外。」

當時我好忟，即是行邊條路都一定塞死啦！我內心係咁祈禱，求天父給我內心平安，唔好忟，唔好發牌氣！好彩老公已經自行到咗，幫我哋係課室門口到排隊，我同婷婷係仲差半分鐘的情況下才到達，個妹仲話要去洗手間，好彩老師未叫人入去咋！趕得切！

我好喜歡我的母校，真的希望兩個小朋友能在這所學校學習做人的道理及認識主！唉！都係要一個月後先知！

好開心，今日我對婷婷妹妹重拾信心，培正幼稚園收咗佢！因為之前我同佢去鑽石山靈糧堂到INTERVIEW，身為老師的我見婷婷當日的表現係個組十二個中最好的，舉手答問題，同老師有眼神的交流，拍椅子，懂得講再見！但係居然係：唔收！

之後去培正INTERVIEW，我都念住輸的，個個小朋友都扮到靚一靚，只係婷婷最撲素，仲有就係佢自己一個入課室，唔知佢的表現。雖然培正唔係我哋杯茶，但係做阿媽的今日收到依個消息真係開心同安心D，起碼有一間收咗(我好懶，只係幫佢報咗三間)！

依家就要等一月尾去禮賢到INTERVIEW，希望成功，請代禱！

今日係婷婷妹妹學校的親子旅行，以前卓希讀時我哋無參加，因為當時忙著幫卓希INTERVIEW，今次本來都無參加的，但係原來婷婷的INTERVIEW改到去12月4日，咁就去玩下啦！

其實都唔係好啱小朋友玩，無乜大的地方給他們亂咁跑，只係整PIZZA好好玩，沙樽妹妹好落力咁整，都係整到少少，好趕時間，下午直頭係一日遊個D團必經地方，SHOPPING！

《秋天到》
秋天到，天氣涼，
晚上會蓋被，
早上加衣裳。

今日我返十二點，終於有機會帶佢返學啦！今日係佢第三日適應學校的生活，所以都係返一小時，不過家長就唔可以陪伴啦！我由昨晚已開始係咁同佢講：媽媽明天帶你返學，但係媽媽唔陪，要返工工，會接妹妹放學。佢一直都表現得無乜嘢咁，直到今日帶佢返到學校門口，佢就知事態的嚴重性，就係媽媽唔會陪！佢一路係咁話要媽媽陪，一路開始喊，真係楚楚可憐的，但係硬心腸的我，一放底佢就走咗，因為得一小時，又要去銀行，又要搭車返屋企攞車，然後先接妹妹，時間真的唔夠！一小時後，帶埋工人姐姐去接妹妹，佢喊到謝哂，個樣真的好好笑，楊校長係門口話妹妹喊吓，又停吓，想想吓又喊過，我聽到就覺得好好笑，但係妹妹個樣真的好似好慘咁呀！

跟著仲未忙完，接完妹妹就立即去接哥哥希，因為卓希放10:45，點知好塞車，真係啱啱好咁趕得切去。因為卓希講咗好多日，都話請求我可唔可以佢排家長隊，即是想我去接。我見佢放10:45，仲可以趕得切返工，咁就去接佢啦！好，終於接埋哥哥希，好快咁幫佢哋找到一輪的士，全推上車，然後佢哋返屋企先，我就返工！雖然真的好忙，成個早上都係週圍咁轉，但係為咗兩個小朋友，我真的甘心情願的，因為我放在學生的時間多過對他們！

返到心光後，又係一輪開戰，工作工作又工作，重要遇上擦鞋王的指證，憑著天父給我的耐性給清醒的頭腦，把要說的都講出來，後果如何？不知，但知對方一定不會讓我好過的，求天父加給我力量去面對，多禱告多有能力！

手機由昨天已經開始壞壞地，無啦啦自己會自動熄機，今日要打給老公時，真的忍無可忍，要BOOT成大約十次機先打得到，又要換電話？唉！我真的敗家，成日個電話都壞，都要換，願來我和PCCW的合約係去到今個月的22日，好，一於轉台，PCCW真係好多地方都收得唔好，連屋企都麻麻地，唉！破財！

今日係婷婷妹妹的大日子，佢終於都返學啦！

不過，如我所料，佢一定有喊啦！嫲嫲報料，全班同學仔都無人喊，只得佢一個，OHHH，佢老師有排頭痛啦！

工人姐姐幫婷婷影返學相，所以相片的質素麻麻地！

 最好笑係最後依兩張，係佢上完堂之後影的，即是喊咗成堂之後，無哂力個樣！

心光大轉變終於都嚟啦！梁院長昨天係LAST DAY，佢今日都有返嚟同我哋一齊有早會的時間，然後佢逐個DEPARTMENT去SAY GOODBYE，有少許傷感，但係工作太忙，無時間去俾自己諗嘢。到放工時，見到梁院長以前楂開的車係我旁邊，但係佢個人就已經走咗啦！即是有少許感觸，唔係想喊，而係傷感！有時我都會係佢面對同佢quarrel一番，我未必認同佢處事的方式，但係我承認佢係一個好人，仲係好錫學生的好人，希望佢退休的生活會開心又快樂啦！

妹妹九月一日便要返學，依兩日我哋係屋企到演怎返學的日子係點樣的。一早起身，飲奶，然後去洗手間到大大(妹妹的指定動作)，跟著就穿校服，鞋、及背書包。仲有少少口缺要教的：(我講前面，妹妹就會成句講，再自己填上最後的字或詞！)

「妹妹要返：學！」

「妹妹返學去：玩！」

「返學好開：心！」

「見到小朋友喊：就叫佢唔使喊！」

「爸爸媽媽返工，哥哥返學：妹妹都返學！」

希望佢會記著同用得著啦！

今日係心光那位同學的安息禮拜，但係我無去到，因為妹妹學校家長日，一定要去，因為自從卓希讀過之後，變化好大。

嘩！依間學校真係搶錢，以前卓希讀時都只係著圍裙仔，但係依家就全部校服，仲要用埋佢的冷衫，又唔係平，全都係貴，連運動衫都要買埋，最過份係毛巾盒及水杯都要用佢的，真的太過份啦！

由於要著校服，咁就一定要WHITE SOCKS、黑鞋、白色底衫，真係超煩，係我快要返工的一個星期內要完成哂，有點兒吃力，但明天姐姐回來，希望可以幫到少少啦！