港楊回憶，樂趣無窮！

昨晚“陪訓”時，點知成家人都訓 哂，由昨晚九時半，訓到今早八時，大約足足十一小時，勁！我本來諗住等兩個小朋友訓咗之後，就寫日記，但係點知都要等到星期日晚先有時間！

點算呀！卓希開始話唔返教會！！！！(o哂嘴！)佢話返教會好悶呀，咁我又好明，兒童崇拜得四個小朋友，兩個係高小的女仔，另外兩個(包括卓希)係四歲的小朋友，人太小，又有時唔啱嘴形！

跟著，卓希係咁同我講，話要開始返禮賢會(即是佢學校嗰到)，之但係我唔係好想返，嗰到好多人，星期日共有三堂崇拜，每堂有成百幾人。我問卓希點解佢想返禮賢會，佢話李老師叫佢哋返，哦！原來又係想見李老師(太突然停課，又太耐無見啦！)我俾佢揀，返禮賢會，定係宏志哥哥的靈匠堂(mormor,morfar嗰間)，佢居然仲話禮賢會，咁我無法啦！為咗鼓勵佢返，只好就範，下星期才開始！

不過，突然被我諗起禮賢會負責兒童事工的牧師，係卓希同學的爸爸，又係成日嚟心光的牧師(依個都係我唔想返禮賢會的原因，太多熟的牧師啦！)我打電話給陳牧師，問清楚兒童主日學及兒童崇拜的情況，跟著就係最重要的，李老師是否也是返禮賢會？答案係：no！咁我話俾卓希聽，佢唔會見到李老師的，因為原來李老師唔係返嗰間禮賢會的，佢即時話：「咁我去宏志哥哥嗰間啦！」

唉！早知就一早問清楚，唔使我諗咁多嘢，又係咁週圍打電話！

是日，一位外讀生洗禮，又係慈雲山嗰間教會，d校友及外讀生係咁笑我，話我去嗰間教會去到都唔知第幾次，我話，去到連邊到有錶位都識啦！哈哈哈！

洗禮係一個重新，在眾人面前立志，希望心光的同學仔，永遠記得自己立志受洗嗰刻的心志！

今日又去咗東區醫院啦！依家豬流感爆發得咁緊要，我真係好唔想去醫院，如果唔係為咗瘀過墨豉的腳的話，真係唔鬼去！今日的booking，係judy幫我做的，所以打尖咁排第一個睇潘醫生，第一個呀，咁大個女都未試過！(係咪好鄉下妹呢？)

感謝天父，最近專科門診部只得四個錶位，只剩一個。咁我唔使泊停車場，又唔使經過急症室，又唔使經過主座大門口！天父必保守！

醫生話我d皮膚對中藥敏感，所以黑到咁！(但係中醫師話依d係瘀血吸咗出嚟！各自講一套)本來醫生係想幫我抽瘀血，但係腫咗嗰到週圍紅咗，即是發炎，要我食一個星期的抗生素。下星期四再去覆診！仲要著住一隻壓力襪，好熱呀！

我已經upload哂所有報告，只差中三班，等埋佢哋今個星期交功課，就可以計埋d分，大功告成！跟著我的大計，就係執櫃，所有的櫃都執一執！

見到一班正生書院的學生，默默無聲的被其他人話，真的很心痛！雖然要俾機會人去改過唔容易，但係依班學生已經改過，仲好好咁學習一技之長，為何這樣對待他們呢？雖然，也許那不是一個好的選址，但都無需要咁對班學生，真的不公平！

由於豬流感已經係社區爆發，教育局宣佈由明天起要停課，今日下午，所有學生都雞咁腳人！心光寄宿生係咁執嘢返屋企，嗰個都好似走難咁！真慘，視障人士的點字書本本都已經大過其他印刷書啦，仲要係一個書包有好多本，跟著另外大膠袋仲有好多本，分分鐘佢哋拎的嘢重過佢哋幾陪，真陰公！

究竟停課係好定係唔好呢？我唔知，如果身份係媽媽的話，就會膽心依段時間小朋友有乜嘢節目。如果係大些的學生，就好，因為可以遲些才考試，又或者有機會唔使考試。但係老師呢？我依個老師就唔知，因為我出咗卷，未改錯處，對我嚟講，無乜所謂，不過夏令營有90%會取消，可惜！但我又見到未出卷的同事開心到飛起(我無依種的感覺)，因為佢哋以為有大把時間做嘢，之但係今日放工時，我係開會表到睇到，已經有好多個格格填滿咗，要開好多會，又點會有時間出卷呢？

卓希本身明天不用返學(佢學校畢業禮彩排)，但係我明天要開會，唔會係辦公室到處理文件，所以唔帶得佢哋兩個小朋友！下星期也許會有機會，點都要救一救姐姐！

停課對我嚟講，一d都無開心的心情，因為我這一個星期情緒比較壞，有少少失控，少少嘢就流眼淚，少少嘢就罵到卓希芍婷七彩(所以妹妹晚上有時唔肯跟我，因為我真係好惡)。失控的情況，有少少似去年生咗妹妹後，成日流眼淚，覺得自己好無用，少少嘢都做唔理！卓希講多兩句我都覺耳仔痛，個心好煩！一句講哂，停課！我一d都無開心到！

p.s. 我今晚又開始失聲，好彩明天不用水運會！(不過今年唔係我做司令台，只係坐定定睇住班中一)

今日臨去醫院覆診時(骨科，半年一次，但次次都好“金”)，姐姐問咗我一個問題，佢話：「楊太，你隻腳咁腫，又咁痛，但係我見你好似好輕鬆咁，乜唔痛得過上次有膽石咩？」

我！大頭蝦媽媽，真係無諗過依個問題，當時趕住去醫院，就無答到佢。係醫院到，我諗咗好多嘢，尤其是今早姐姐的問題。係！我隻腳腫到不得了，連醫生都一定要我排到照x-ray先得。之但係，我今次又唔係好覺好慘，只係行動上不便，思想上無乜嘢！但係，上次的膽石事件，真的永世難忘，嗰種痛，係自己幫唔到自己的，腳痛都可以浮冰，膽痛就週身唔舒服，而且會影響到其他身體機能，完全難以抵受的！

所以，當我經歷過上次膽痛的事件後，就算今次隻腳人人睇到都嚇親外，我自己好接納。因為係我自己一時唔小心之餘，可以用其他方法幫忙減輕那痛楚，但膽痛就點食藥都無用，感覺係無助！

感謝天父，讓我在膽痛的功課上，又學會了“一山還有一山痛”的理論，教導我凡事都要慢慢化少，做人就會更開心！阿們

89年六四，當年我還在瑞典，每每見到電視機上學生一幕幕的倒下，眼淚不其然地流過滿面。故，這二十年來，我不敢再看那些相片！ 真的，毋忘六四................................

p.s.我依幾日係baby kingdom到有唔開心的經歷，等我有時間，先慢慢講！

財多身子弱？咁我又唔係有好多財氣，只係我相信我都有唔少財寶積在天上！

昨晚“陪訓”時，鼻水倒流，都開始有少少失聲，今早早會時，個學生彈琴又高1.5個key，唱到我吊住條頸！一於少出聲為妙，但係臨放工時，鼻水倒流多咗，立即去睇中醫，佢話我作感冒，之前好幾日我背部都好痛，仲以為係唔夠訓的骨火。原來係作感冒，返到屋企，嗱嗱臨載口罩，希望唔好傳染兩個小朋友啦！

飲苦茶！

今晚又去上堂，返學行得好慢，因為怕拉親個傷口！

今晚上的方舟導賞課程，令我想了很多以前無想過的感受。袁文輝一眾人上土耳其的「亞拉臘山」，以聖經的記載和一直以來探索的方向，都表示挪亞方舟是停泊在亞拉臘山的。(科學家的衛星圖)

 (另一張衛星圖)

 一路聽他們分享多次上山的經歷，又在四千幾米的山上找到樹木的化石，連現在也許會找到方舟的空間時，我的思想也不斷的想想想想想............................

人們一直以來，都不停地上山找方舟，目的是甚麼呢？相信大部份人都是和影音使團一樣，是為了證實聖經所說的真確性。人，不斷地向山上進發，但挪亞的時代，便是一家八口，和所有的動物向山下走！想想那時，當挪亞一家走出方舟時，全世界，真的全世界，只有他們八個人，那是一個很lonely的感覺。而，雖然在方舟裏好像很迫似的，但所有人和動物出了方舟後，地方大了，空間多了，大家四散，再一次lonely的感覺。

我的思想有點亂，需要重整！不過，雖說上導賞課是增加自己對方舟的知識，也可說是自己對信仰的另一類反醒！

全城熱洪洪地談論“豬流感”，我也一樣，不過談論的對象也只是家人。老公對今次政府的做法形容為“誇張”，但我自覺得到上次sars的教訓後，今次是政府的“政蹟”。雖然都未夠切底，但係都叫做有警覺性，唔使等到真係死人先做嘢，咁就太遲！人是會受過教訓後，先會有改進，(除了我老公，次次叫佢唔好俾d食咗容易咳的嘢卓希食，卓希有事時就“哎呀”，無事又想俾佢食時就話“好少之麻”，吹漲之！)所以，我的立場是，贊成今次政府的做法，人，唔怕一萬，只怕萬一。萬一傳染到一個好似sars時淘大那個超級帶菌者時，就已經太遲了！而且，依家依班被隔離的人，其實都只係得個“悶字”，對佢哋嚟講，未賞唔係一件好事，可以真的檢查清楚自己的身體，確保真的無事時，便又可以再過新生活。那只是七天，用七天的自由換來很多人的不被感染，會有很多人對他們說聲：謝謝！

但那墨西哥外交人士今天在新聞中所講的真的很過份，簡直係無知！佢哋都唔知到香港地少人多，人與人之間的空間太少，所以sars時先攪到咁。佢地帶病菌周圍走就得？
其他人自我保護就唔得？？你哋睇嗰個出嚟講嘢的女局長，自己咪又係一個口罩掛住係條頸到，無知！

我的傷口痕咗兩日，本來諗住等星期一先到樓下的九龍灣健康中心到洗傷口，但係太痕啦！昨晚係咁上網搵，搵到觀塘及新浦堈的健康中心好近我家，今早，老公未返工前就帶我去新浦堈到洗傷口。嘩！超多人，都等咗好耐先到我，姑娘話可以星期二先再洗，到時只需要到樓下的健康中心就得啦！

今日成日我都無食止痛藥，因為我唔想個人成日都fing fing吓，好唔踏實咁！

不過，我覺得d麻醉藥仲未過氣，因為就算我無食到止痛藥，個人係會突然好喝睡，就好似做完手術後係醫院時一樣，成日都會突然間自己訓咗。而且，我個嘴仲有三份一的地坊未受控制，食嘢同講嘢都要就住就住咁！唔怪得知人哋話打一次全身麻醉藥，個人會好傷的，原來真係有好多日都會身不由己的！

食咗止痛藥的話，個人就會好暈，又成日想訓。唔食止痛藥的話，細動作都無問題，一大動作就唔得！唉！我都係希望堅持係臨訓先食止痛藥，日頭食的話，就好似拍咗fing頭藥咁，個人暈下暈下咁！

p.s. 終於寫完兩天在醫院的經歷啦！

今日有同事問我“怕嗎？”，我表示，以我的信仰，是不怕，那是一定的。而且我沒有時間和精神去怕，因為無論家庭或工作，都好忙！(晚上還去上堂)

但，放工後，心情開始有少少緊張，在依稀的記憶裏，半年前的住院經驗中，那躺在冰冷手術床的感覺，我很不喜歡！其實，如果在入院前兩天，能給我時間靜下來，感受和思考自己的內心感覺就最好不過，我現在也是工作行先，手術在後！

這是天父的殿，我知，我會好好的保管！

今日好忙，忙乜嘢？一家幾口去咗禮賢到睇卓希係學校的作品(我昨日無睇到)，跟著卓希去旺角畫班，然後再去青衣的英基到學英文，返到屋企，我散哂！好彩下星期係公眾假期，如果唔係做完手術後仲要走嚟走去，我會攰死的！(唔知係咪昨天著高跟鞋，今日左腳的腳掌好痛，晚上仲痛到行唔到！)

前兩晚，係facebook到，見到有一個以前的朋友add我，我真的好震撼，立即諗都唔諗，好快咁add咗佢。佢以前係我教會的，大家一大大班人一起成長，不過因為一d個人的意見不合，領到教會分裂，當時有一個傳道人，帶住一大班人走咗，而依一大班人，就係同我由細玩到大的。

今晚不經意地又去睇佢個facebook，但係諗諗吓，唔對路。以前個識嗰個朋友，佢係姓葉，但係佢英文串法係IP，而依個又係姓葉的人，佢的串法係YIP。突然，一陣好失落的感覺，然後係互聯網到係咁找，最update的係佢2001-2002年係某一間中學到做班主任。

然後，我又找到嗰班走咗的教友，佢哋自組咗另一間教會，好近我的教會，但係十幾年以來，我都無見過佢哋！有些係我以前教過的團契青年人，原來都已經結咗婚，仲有一個三歲的女。但係我唔敢去add佢哋，只想遠觀而不想近之。

心情好復雜！

如果唔係入咗教師依行，也許我會做咗考古學家！

點解咁講？今晚的方舟訓練，講咗好多關於世界各地有關洪水的印證，我以前細細個已經好鐘意睇有關考古學的紀錄片，尤其是一些關於古文明的世界。不過當時就無諗到自己要做考古學家，但今晚又講起所有的世界印證時，個心係咁跳得好急，好想好想好想知多d。好快，兩小時又過去，楂車回家的路上係咁想，如果唔係有兩個小朋友，又如果唔係有份工，或者我會有興趣去搜羅不同有關挪亞方舟的資料。做一個導賞員，就係要對自己的信仰扎根更深。

SMS對話

今晚由心光到油麻地上堂，一直最担心的係泊車問題，因為嗰到無停車場，只係得街邊十個車位。心理準備都預要等，但係等咗二十分鐘，都無位，好多車位都被嗰到兩間的快递工司罷著。等著、等著，便打sms給老公：

老婆：「點算，無位泊車！」

老公：「回家！」

老婆：「吓！但係我想上堂！」

隔咗十分鐘後：

老婆：「終於等到有位泊，感謝主！」

老公：「神愛世人，甚至將車位也賜給我們，叫一切信祂的不..........」

我今日放工，無哂聲！返到屋企，真的唔想講嘢，無法下，就落咗樓下的洪醫生到睇，佢話我係感冒引起的，要我唔好講嘢兩至三日。仲要食消炎藥，因為佢話我的聲帶同喉嚨裏面全部腫哂！

無法啦，明天一定要請假。睇吓星期五自己的情況如何，如果唔係得關老師一個人做司令台，講足全程又係好鬼辛苦的！

攰！訓先！

今早個鐘响時，我係知道的，但係順手就關掉了，以為自己已經起咗身，但係原來仲係張床到，直到老公的鐘响時，才知訓多咗十五分鐘，嗱嗱臨起身梳洗，仲要幫自己塊花臉油灰水。

鬼咩！一張床訓四個人，阿大楊生又覺得個仔自己一個人係咁凍的天氣下係房仔到訓好慘，咪係咁迫囉，但係唔知點解訓正兩個小朋友中間嗰個係我？成晚唔係俾依個踢就係俾嗰個踢，整到我訓得唔好，已經好多晚啦！仲係咁的話，我會放棄哂三個姓楊的，自己走開去訓！唔使返工咩？

今晚我的腦好忙，因為要幫自己的母校寫感想。其實都要多謝facebook，讓我可聯絡上禮賢的舊生，在慶祝五十週年的同時，也能寫點點感想，所以要諗得比較仔細及文雅。努力，加油！

不過，仲有一件令人發笑的事情，話說我們的舊屋已經到期要續租。今晚同老公傾起時，一講曹操曹操就到，租戶打電話來。先先講到自己係幾咁好的租客(我先唔踩佢)，又話大家係基督徒(但係我唔覺佢哋有好的見證)，然後就講佢哋的要求，想依張租約完咗之後，一個月一個月咁租到佢哋找到屋買為止。我唔會立即答佢，先先問問老公，然後問經紀，經紀都話遂個月好麻煩，不如三個月三個月(要寫合約，有利於我們)，而且我係會加租的！睇吓佢哋會唔會再租啦，我已經做到最好人的啦！

祝各位：

新年快樂，身體健康，主恩常在！

今天下午覆診後，見有時間，就去咗辦年貨。先先去吉島睇，但係今年的嘢我覺得一d都唔平，然後就決定先前所睇到的禮品。

我個邊親戚多，所以每年都要買成十盒。買年貨我都有心得，個個都大哂，買糖就係最唔實際，買餅又唔係個個都鐘意食，有幾年都買過飽魚麵，今年想轉轉佢。想知係乜？過年先話你知！