事緣我之前幾天條氣管已經唔好,係咁hehe haha,頂唔順之時便要吸擴氣管藥,我唔係到最後一刻都唔會吸的,因為好刺激個喉嚨,跟著就會喉嚨發炎,痛到c,跟著就係咁咳嗽。唉!我終於都喉嚨痛,仲開始有少少咳,希望唔好傳染俾卓希啦!我今晚聽到連卓希爸都有幾聲咳!!!


我今日好忙,一早便三個人去新屋到等新sofa到,然後去食飯,跟著下午要返學(bu)。但係卓希仲有開心荳芽組的,咁點算呢?咪就係要搵依個食古不化的卓希爸去囉!點解我話佢食古不化?因為佢今日話卓希學卷腸仔包,又學搽牛油落麵包到,佢話咁細個小朋友都唔會做依d嘢啦!跟本就學唔到嘢!我都俾佢吹漲,識又使乜去學校學y,佢d學生咪又係一樣,佢教的嘢都係新嘢咁佢係到先有意義的麻!


跟著就係同我吵另一樣嘢,就係關於卓希午睡的事情,因為今天食完午飯之後,返到屋企,叫卓希上床訓,卓希爸陪佢,點知成四十五分鐘都未訓著。有見及此,我就話出門口啦,免得又遲到,卓希一上到我的私家車到後,都未出停車場,佢已經訓咗,咪可以訓十五分鐘。係開心荳芽組時,指定動作就係要佢爸爸抱同唔聽指示(咁佢爸爸咪唔鐘意囉)。返屋企的途中又吽吽哋,點知返到屋企鬼打咁精神。我返到嚟後,要去皇冠到攞返架車,卓希話要跟著,但佢爸爸又好似塊化石咁係屋企。咁個小朋友咪兩難,係咁扭,係咁咸,咁佢爸爸就話我好係佢訓晏覺時抄醒他上依d咁無用的堂。(我一d都唔同意佢的睇法)我帶卓希出去,佢又要話個仔咁扭法,但係又抱佢。我去完攞車返嚟後,卓希訓咗,但係個時已經係晚上六時十分了。我一於唔俾佢再訓,叫醒他起身沖涼,然後我要帶他去街街。卓希一見到佢爸爸係屋企時就係咁成日扭,我星期五一個人帶著佢成日都未扭過,所以我有時好討厭卓希爸咁緊張的,因為縱到個仔無論!


同卓希沖完涼之後,又輪到卓希爸唔like,唔同我哋出去,又要係屋企到玩自閉。咁好啦,我自己一個人帶個仔出去,我都未怕過,橫惦星期日好多時都係我一個啦。卓希好想出街(有邊個小朋友唔鐘意出街的?)但係佢爸爸唔去,所以由家門口行去停車場的路上卓希都係咁咸,係咁講:「爸爸,去!」連個仔都知佢爸爸係咁麻煩!


我帶卓希去九龍城,因為那裏有幾間家庭用品店,好平的。先帶佢去食kfc(佢的致愛,可以即時忘記卓希爸),食咗一半白汁雞皇飯,兩隻蜜汁雞翼,仲有就係半杯水。我就全部都係跟佢的口水尾!係九龍城廣場,卓希乖到不得了,佢係咁拖住我的手,係吉之島的十忟店都唔會係咁攪嘢,同佢講道理佢完全明白,仲好合作。所以教小朋友真的要堅持,唔可以心軟!卓希今晚仲全程自己行,我一d都無抱過,由停車場返到家門都一樣,我哋仲玩跳溝渠蓋,心情極之靚,同出去之前判若兩人!

arrow
arrow
    全站熱搜

    suklaic 發表在 痞客邦 留言(0) 人氣()