close
放工返到屋企，立即帶著口罩的我，同兩個小朋友玩，佢哋真係好得意！
認同
今早楂車返工的路上，聽陶傑的“陶言無忌”，好認同佢的講法：(摘自881)
教統局經過一年咨詢，就宣布微調方案，從此英中同埋中中就表面唔再一刀切，但係就會容許一間學校只要過去兩年獲派屬於全港「前列線」四成嘅中一新生，平均比例達到一班學生人數嘅八成半，就可以開設一班英文班喇，其他嘅學生就要打入另冊，入讀非英文班，亦即是母語班。佢嘅稱呼就連英文同中文都唔敢名正言順講，只係講英文班同埋非英文班，本身就係喺心理上希望減除一啲「中文」兩個字令人低等嘅心理效應。
只不過微調之後，產生新嘅問題就係叫學校自行決定。近幾個月以來，一旦聽到學校、銀行自行決定，就令市民談虎色變。好多銀行收到依啲迷你債券嘅方案都係自行決定，結果搞到好多「伯爺公」、「伯爺婆」嗰啲棺材本就見財化水。叫學校嘅先生自行決定，最近亦都有一間，就叫做基督教臻美黃乾亨小學，其初中學校亦都被指為八年來由註冊開始就管理混亂，公帑就是否用得恰當都有好多種問題，證明教育當局對學校嘅監管完全係有心無力。
旨意學校自己去自行解決，越解決就越多問題，喺香港教育嘅政策自找煩惱，本來殖民地時代推行咗150年嘅殖民地教育相安無事，一旦1997年之後，「改依改路」，於是就自埋地雷，到而家一一爆炸，咦？似乎喺清理咗董建華先生嘅地雷之後，而家依個微調方案又埋緊一啲新嘅地雷喎。不過唔緊要嘅，正所謂董生話哉，經一站就長一智，慢慢摸索先至施政會有進步啊嘛。不過喺摸索個過程，一摸就十年，一代嘅學生，佢學習能力最高嘅黃金十年，原來證明係錯嘅嗰種教育方法，咁依啲學生又點呢？將來香港嘅僱主面對依十年白老鼠嘅失敗嘅母語教學，長大咗出嚟，請依班人又點請得落手呢？個薪酬又點制定呢？依啲就係將來嘅問題，而家仲理得咁多咩，等過兩任嘅特首自己頭赤到夠喇。
陶傑今早講得好啱，係英國政府統治的150下，香港教育際度都相安無事，但自九七之後，亂到不得了，緊張的家長四處張羅，壓力大的教師就大把文件做，連累的，就係學生！
全站熱搜
留言列表
廚藝“棒” (5)
