港楊回憶，樂趣無窮！

卓希真係大個仔啦！今晚佢洗澡的時候，係到要我兩老去洗手間到睇佢，佢要show off自己有幾叻，自己洗頭，洗身！望住佢，就會諗起佢細細個時，係舊屋到用盤同佢沖涼的情境！依家妹妹我就少咗同佢沖，一嚟自己條腰唔係咁好，二嚟經歷咗以前有芳ee=無工人一樣，依家好多時，我都會請姐姐同佢沖，不過，下午熱到飛起要過水的話，我哋兩母女都會一齊玩下水！

總之，我家有個大個仔，自己懂得沖涼的豬仔希啦！

只因卓希的緣故，我哋今日提早咗一小時返教會，返靈匠堂。卓希好開心，同宏志玩得好開心，又有宏志照顧佢，婷婷見到咁多小朋友玩，佢癡癡吓我都自己走咗去！

不過，我自己始終都係想返番靈工堂，自己的教會麻！靈匠堂唔係唔好，不過我唔係好識其他人，都係無嗰種感覺！但係為咗個仔，我都要諗諗佢！

自從老公有咗車牌後，如果唔係趕時間，我都會由得佢楂車，不過次次我都膽驚受怕，因為佢有少少耳仔手眼不協調。唔知係咪卓希豬成日聽我點樣教老公楂車，每次佢一見到佢爸爸坐咗係司機位時，就一定評擊佢的技術。

精句一：

「我第時大個一定楂車，楂得好過爸爸，爸爸你楝咗咁多次，都唔識楂的，我覺得媽媽楂得好d！」

精句二：

在停車場時，經過一個博位，dun咗一下，「大佬呀，dun到我個pat pat 呀！」

精句三：

「爸爸你都唔識路，你唔識路就俾番媽媽楂！」

精句四：

「我唔要爸爸楂，我覺得媽媽楂得好d！爸爸都唔識得行隧道(機隧)嗰條路！」

唉！次次都忍笑忍到我不得了，依個仔真係精彩，雖然佢講的都係我內心的說話(哈哈哈)，不過我唔可以唔俾老公練車，如果唔係，佢唔會有壓力要學認路的！

我上網好辛苦咁先找到藍武士變身器，仲要自己走去地鐵站交收，做人阿媽真係唔容易！

卓希的同學仔，我都只係識得少許，因為我唔係全職媽媽，都未試過去幫手做義工，所以好多同學仔都唔係好認得。不過由於上次卓希攪生日會時，幫佢寫生日咭就認得幾個同學仔，又同d媽媽交換電話號碼，所以就識得一二啦！

卓希日又講，夜又講的晞朗，今晚請咗佢哋一家嚟我哋屋企食飯，本來佢哋怕打攪我哋出去食，但係因為豬流感爆發得咁利害，我提議嚟我哋屋企食好過，仲有地方給小朋友玩玩具！

卓希好耐已經好期待今日，因為係佢學校的玩水日，即是可以攞正牌玩水！

不過，由於兩個星期前，我無去到家長會(星期四晚我要返夜)，所以我唔知佢哋今日需要義工老師，如果唔係我一定去幫手的！

下午我就自己辦私人的嘢，跟著黃昏時，mormor、morfar突然話要嚟我哋屋企，又係我下廚的時間！(半小時內用光波爐整好幾樣餸)

卓希原來係學校學咗一d中文字，但係由於我哋兩公婆成日都好夜先返，而且盡量顧住做功課，所以一直都無同佢溫習。今天把心一橫，做一些字咭出來，當中的圖片，盡量是他日常生活時常見到的，希望他明白啦！

今日約咗卓希一班同學仔出嚟玩，返完教會之後，草草食過飯後，就出發：聽濤雅苑

唉！我怕今次之後，班女同學唔會再肯同我哋d仔再出嚟玩，因為男仔真係好吵耳，吵到我耳都痛！

原來卓希係學校學咗好多詩歌，我想整個mp 3詩歌資料庫，但係點都搵餘兩首搵唔到！

1. 神大愛：願您平安

2. 不再做bb

3. 亮晶燈：天陰天晴天下雨

4. 我要讚美耶和華：耶和華是我的牧者

5. 全地至高是我主：全地至高是我主

6. 我是主的羊

7. 生命陶匠：萬代君主

8. 和平之君：讚頌您的愛

仲未找到的兩首歌：

1. 生命福意事工：舉目望耶穌
2. 我要高飛：乖乖之友

係二月份時，卓希學校出咗張通告，話3月3日開始到3月12日，可以安排家長去觀課。當時我係填咗今日，因為平時的星期五返十二點，諗住睇兩小時，十一點就可以走人。

點知，天父真的好奇妙，我1/3/2009星期日要返工，原來可以有得補假的，嗱嗱髻2/3/2009入紙睇吓院長批唔批今日放假，e，佢又批，咁就好啦，可以睇哂全程！

我一早就同卓希一齊坐校車，原來校車接咗卓希之後，仲去麗晶的嘖水池接多一個學生，跟著先去德福接三個學生，我成日都以為係去咗德福先嚟麗晶。

一去到學校，卓希就自動自覺去排隊睇體溫表，我就去花園到聽園長講嘢，又聽孫老師brief。

一入到課室，就係小朋友的親親天父時間，嘩，原來有咁多首詩歌我都唔識唱，要惡補一吓先。最得意係原來卓希識唱好多詩歌，仲有好多手勢，尤其是手語，因為李老師識手語的，成日教小朋友唱詩歌做手語，我都好落力咁跟著做，真係好耐好耐以嚟第一次唔係自己做主導，所以好享受依個敬拜時間。最領我深受感動的，係當李老師話要祈禱時，小朋友們提議跪係地上祈禱，我感動到想喊出嚟。一間真真正正的基督教學校，福音工作得到好大的支持，連小朋友都咁叻叻！

祈禱之後就係唱遊的時間，平時唱遊之後就會去花園玩，不過今天天氣唔好，所以唱遊時間長咗少少！李老師要我哋圍圈坐，我緊係想離開卓希多少少，點知佢有一個男同學，成日癡住我，真係好好笑。當李老師要我哋兩個兩個對唱時，依個男同學立即嚟我前面，只係拉住我雙手，咁我就同佢一對啦，點知卓希係我後面拉我，想我同佢一對(我唔想，唔想佢癡我)，跟著我話佢的好朋友係後面，同佢玩啦！講番依個拉住我的男同學仔，唱歌時李老師教我們要有眼神交流，但係佢又害羞，望咗第二面，都係要成日提佢先望番過嚟，唔知係咪我靚到佢害羞呢？(飽c！！！)

點知唱完歌，要坐吓玩遊戲時，我都係走唔到，要坐係卓希身邊，嘩！我條腰坐到直一直，要有好的榜樣麻。但係隻豬仔希就係咁好似好friend咁挨住我，又攬住我隻腳，有理無理佢，我自己一於同同學仔玩(仲有，頭先嗰個癡住我的同學仔，又走嚟坐係我身邊，好攪笑，原來我d吸引力未減！哈哈哈！)

唱遊完之後，就係分組活動，一組去英語會話班，一組去專題學習，一組去做手工。每十五分鐘轉小組，我覺得依個安排好好，小朋友的專注力唔長，可以轉換吓對佢哋係有幫助。

開心的時間過得真係快，又係時候say goodbye，十一時三十五分，家長們要去分享會，分享今日的心得，見見園長，跟著就接放學。

天父，多謝祢的安排，如果唔係，我真的無咁的機會同時間！同埋，我今天真的感受到無幫卓希選錯學校，禮賢真的給他很多，尤其是在敬拜方面，求天父教導他愛主及愛人，感謝祢！

卓希係要我上網找波兒歌，哈！又俾我搵到依個！

卓希豬終於都四歲啦！咁啱，我要補番之前的假，所以今日係我同佢的相處日，大家都好開心咁去玩！

晚上mormor，morfar同anders舅父佢哋都有嚟，咪又係為咗隻豬仔！

後記：唉！我就快頭爆，好多晚都訓唔著，昨晚好少少，可以訓到，但如第二天要返工的日子，就慘啦！點算？工作壓力攪到我真的回唔到氣！

卓希係2月20日生日，今年係一個星期五，嫲嫲話做生日有早就無遲，咁我哋就決定早幾日同卓希開生日會。我已經早兩個幾月去德福到訂場，但係都係唔夠人快手，為咗要早幾日，咁就要去遠少少的淘大m記。不過嗰到真係細，無德福嗰間咁闊，好彩唔係個個小朋友都到整，到整的話，大人一定無位坐！

今日所請的朋友類別：bk0502朋友仔、親戚、同學、教會玩伴。

卓希好開心，因為佢之前去咗好多的生日會，自己都唔係主角，今次真係係自己做主角時，又好興奮，仲有請咗幾位同學仔，會同朋友仔話：「佢係我的同學嚟的！」超好笑！

係m記開生日會的好處係d小朋友鐘意食佢哋d食物(大人就麻麻地，我都只係食咗個包)，同埋有細聲又斯文到暈的姐姐同小朋友玩遊戲，不過都唔係好pro，有時都未能控制d小朋友，唉！我的職業病又嚟啦！之但係時間方面就少咗d，得一個半小時，小朋友們都好似玩得未夠，就要散band！今次我訂依間的蛋糕都幾好味，如果中間有d朱古力crisp就會更好味！

唉！我哋屋企樓下又無會所，咐近的君豪會我唔敢訂啦，一嚟貴，二嚟怕佢到時又無咗service。開生日會，一定要就腳的地方，因為公公婆婆，爺爺嫲嫲都會到，所以最基本就最好東九龍，只好m記也！如果我哋有會所就好啦，可以大d又玩耐少少！

玩遊戲時，為大家打打氣：加油，加油！

派紀念禮物送俾朋友仔！

有時真的不讚嘆天父的安排，今天心光無溝通會，所以我可以返早又放早，又咁啱，上星期知道今天在下午四時許要見家長！哈！perfect！

我未見李老師之前，都已經有心理準備，以為卓希係學校好“活潑好動”，點知...........................相反，原來卓希係學校係好靜的，老師話靜到有時連答問題都唔會舉手答。仲話佢係學校好helpful，時常幫老師服務(但係喺屋企就要我哋服務佢)。不過都有弱點，就係喺學校所學的兒歌背得唔熟，鬼咩！我一打開本薄，佢就一支箭咁走開，又或者讀多兩句就話唔想讀，咁又點會學到y？我都要努力加油！

今早卓希學完畫之後，我哋係朗豪坊的food court求其食d嘢，之後就去咗新世紀廣場，因為睇完波兒後，卓希有時都係咁講，咁咪去睇吓囉！

嘩！一嚟多人，二嚟仲可以行入去波兒的屋企，又有滑梯，我個仔緊係唔想走啦！但無計佢亞媽我好攰呀！

    上個月幫卓希報學校旅行時,都唔知自己今天會放緊病假,咁就一齊去啦!

由於卓希好鐘意坐旅遊巴,及我之前只係幫佢幫咗兩個人坐旅遊巴,所以一早佢就同其中一個姐姐坐校車返學再轉旅遊巴,我就同婷婷妹妹係屋企出發.

卓希order咗好多嘢食,所以我一早六點前起身就開始整嘢食,都差唔多食得嘢的.

 共有五樣嘢食，食哂！

去到大埔海濱公園時,先先家長及小朋友玩集體遊戲,然後就去野餐,自由活動. 卓希玩得好開心,不過玩完返咗屋企後,我成個人都好攰,始終咁多日都無咁大活動量,突然咁多又真係攰咗d!

玩緊親子遊戲

玩托印練習

請老師食嘢

卓希口中的李老師

  真係好啦！昨天去迪欣湖，好多媽媽都有相機，大家可以係唔同角度影班小朋友，仲有就係可以影到我個頂皮仔最naughty一面！

 係R8的巴士到同意粉仔擦出火藥味！

我去咗攞車，卓希就走咗入“水中”！

 想“捉”水！

 卓希自從返咗禮賢之後，就好鐘意以下的一首歌：

【不再做BB】

不再做BB 做自己要做既事
不再做BB 不亂哭不亂叫
乖乖不吵叫 乖乖聽教導
碰上有問題問老師
Oh 衣衫穿不上 身高多一吋
皆因我已長大了 所以.....
不再做BB 做自己要做既事
不再做BB 不亂哭不亂叫

禮賢幼稚園真的好好，upload咗一d小朋友係學校的相上網，仲可以俾家長自由download，唔使好似德福幼稚園咁，要成三大元一張！

今日返咗工後，楂車行東隧返屋企，經過東九龍走廊，me姐姐話：「e，係mega bog！」

咁我就跟正佢：「係mega box！」

依個衰卓希豬就話啦：「mega bog同mega box都係一樣啫！」

我就話：「唔同的，啱的讀法係有x音係尾的！」

卓希豬跟住就駁嘴：「mega bog同mega box都係一樣！」

我就解釋話：「唔一樣的，你讀得唔啱的時候，人哋會笑你唔識的，咁mega box係真的有個x音係尾！依家你話係點讀啦！」

卓希就立即轉軚：「mega box！」

唉！我個仔！

搵咗好耐先係網上搵到這款汽車安全帶套，我哋大人係車到都有用，而且成日俾條安全帶整損，所以好想搵到適合卓希的，終於有啦，不過超貴！