港楊回憶，樂趣無窮！

今日返教會，到主日學時候，卓希又上咗二樓同姐姐們一齊，今日師母都帶埋啟言來，初初卓希都係同啟言坐，不過佢真的好想癡住可言，所以到最後都係要同可言坐佢先坐定少少。

下午我哋一定食完午飯回家後，卓希係咁扭佢爸爸，我叫卓希爸咪鬼理佢，但係就唔同我合作，又話我無準則，又話乜嘢人人都要聽我支簫，我唔係咁意思，係大家一定要合作，咁樣先可以教好個仔。佢係街到扭(係我哋屋企的大堂)，咪唔好理佢，有lift的話，佢自然會跟著嚟啦！成日個仔扭少少就緊張到c，又係咁抱住週屋行，我真的比佢哋兩個激c。

卓希同我兩個一起相處的話，真的係無問題的。話說今晚卓希爸要去“砍”，得我兩係屋企，本來逢星期日都要去奶奶到食飯，不過堂家姐發燒，老爺落order話唔好返去食，怕小朋友之間會互相傳染。都好，我仲有少少擔心點樣一個人帶卓希過去，因為係無車搭的，只可以行十五分鐘過去，隻豬仔近來又唔肯自己行，成日要抱，行咁耐，我點抱得點？

咁我就自己同卓希係屋企，食完粉粉之後，同佢洗澡，一叫佢起身上水，佢就用問我的話氣話：「奶奶」，即是話係咪上水後食奶奶，我話未夠鐘，點知佢就唔肯上水，咁凍的天氣點可以唔上水。我就用今早係教會開的那包甘大支，拿出兩支來引他，九鈔九立即上水。仲好乖咁俾我搽lotion同穿衣服，完全無平時佢同芳ee的扭計法。

然後我本來想開音樂給他，但係卓希爸正在錄影，所以只好開電視給他看，點知又俾我哋睇到亞視講域多利監獄，真的好好睇，我一路摺衣服，卓希一路玩玩具，大家時不時又望下電視。跟著我又同卓希玩咗一陣就開奶給他，完全合作地上床飲奶，不過在開奶時有少少的插曲，卓希係咁搬佢的車仔上床，佢知道我俾咗奶佢後係唔准落床的，佢不斷的來回幾次係咁搬，真的好好笑！

飲完奶之後，佢就好乖咁係床到玩車仔，仲將佢哋排哂隊添！到我要熄咗燈之後，佢無嘢玩就嚟玩我，我話要錫一啖，佢錫錫吓就一口咁咬住我個下唇，痛到我不得了，但係又唔可以表現出好痛，因為佢會係咁追住我嚟咬的。佢終於放過我時，我用被遮住面係到又痛又笑，俾佢發現。係咁係我成手啦、面啦、被啦，係咁要咬，我避得快。跟著就同佢講，媽媽好眼訓，要訓啦，佢又真的會stop。當我聽到洗衣機停咗後，我就同佢講：「媽媽要去掠衫，掠完衫就噃嚟同你訓。」佢就好乖咁自己訓係床到，無落過床，of course我無返返去，佢就係咁自己訓著咗。

所以話，小朋友係要教的，錫係一回事，你可以表逹你錫佢，但係大人都要堅持著規則，小朋友好容易適應的，只要大人忍多一至兩個星期，就會舒服一世！