港楊回憶，樂趣無窮！

我係facebook到開咗個光波爐食譜會，真係好，有好多志同道合的人士upload佢哋的食譜同埋相，所以，今晚係照足佢哋的食譜，整咗焗豬排飯，食到個個都話好食！

材料 : 豬扒 3 塊, 蕃茄 4 個, 洋蔥 1 個, 新鮮菠蘿 1 個, mozzarella 芝士適量, 雞蛋 3 隻, 冷飯 5 碗

豬扒醃料 : 新鮮菠蘿半個打成蓉, 豉油, 糖, 老抽, 胡椒粉, 麻油適量 - 醃 2 個鐘頭

獻汁 : 雞湯 1 + 1/2杯, 蕃茄膏 3 湯匙, 茄汁 3 湯匙, 麵粉3湯匙加水攪至漿, 鹽半茶匙, 糖2湯匙.

先將3隻蛋打勻, 先煎一半份量雞蛋至半生熟時落冷飯炒, 加鹽少許, 炒至所有飯鬆開, 再落剩餘一半份量嘅雞蛋再炒至所有飯粒都有蛋包住, 將炒好嘅飯先放入錫紙盤中.
起鑊煎豬扒至8成熟, 放於飯面.
油起鑊爆香洋蔥, 再加茄蕃, 剩餘半個菠蘿炒至香, 加少少紹酒炒勻, 放雞湯, 茄膏, 茄汁炒勻, 再慢慢加麵粉漿至汁收緊即可, 將獻汁均勻鋪嚮飯面.
芝士切薄片或刨粗條, 平均鋪於飯面獻汁上面.
用低架, 以200度先預熱光波爐 5 分鐘, 之後就可以將整盒飯放入去爐, 轉 180度大約 8 - 10分鐘左右直至芝士變成金黃色就 ok.