港楊回憶，樂趣無窮！

今日，妹妹放假，所以早上唔使送妹妹上校巴。我便早咗半小時出門口，因為昨天成日無返心光(早上開會，下午覆哮喘科)。八時正開車，行東隧，睇住佢開始多車，都好快，八時四十五分已到心光。本來返十點的我，未夠九時已返到心光，跟著就係手腳不停咁做嘢、上堂、做嘢、上堂！

今日下午要覆耳鼻喉科，手術後覆診！不過去到時好肚餓，早上返工，做埋手尾太遲走，遇著警察封路綵排七一國家領導人到港車隊路線，好晏才到醫院！

等咗一小時，終於今次見到我至愛的唐醫生，，佢幫我拆線，上次嗰個副顧問醫生真係不聞不問，令到我都唔知自己係咩情況。我同唐醫生表示，左邊現有很多綠色鼻水，唐醫生話也許是那些線癡咗一些LIM物，所以影響到個傷口損咗，而有發炎，又要食消炎藥，真係唔想！今日跟住我之後嗰個慘啦，因為我見醫生見咗半小時，整咗好耐。然後要等一百個號碼先攞到消炎藥，等藥其間已去71咬咗嗰包！

我呀，真係大頭蝦到不得了，昨天早上忙出門口去開會，點知忘了拿放在桌面上的覆診紙，下午去到醫院才知道，幾驚唔俾我睇呀！好彩，可以用身份證，然後佢PRINT過一張給我，所以昨晚嗱嗱林將今日的覆診紙放入手袋，免得自己又忘記！

跟著就諗住返屋企放底架車，然後出尖沙咀MEET老公同小朋友及我的表弟，點知我一上到車，就收到老公電話，佢哋剛係藍田入境事務處拿了PASSPORT，居然要我去車埋佢哋！我都唔識去，佢話係匯景，咁我就硬著頭皮去找他們。點知去到匯景時，一路問個看更去邊個方向可以接到由商場行上來的人時，老公一時話匯景，一時話啟田！唉！我就快被依個無方向感的人激死，原來佢哋去咗啟田，等我仲去咗匯景接佢哋！連個看更都笑，瘀爆！佢哋一上車，我就係咁係倒後境“超”住老公，佢仲想攪便，真係俾佢吹到暈！

返屋企，泊好車，都已五時多。老公答應小朋友先去科學館，又等唔到巴士，只好飛的去啦！小朋友在科學館玩了一小時，週圍都無乜人，好舒服！我哋跟著就去OUTBACK到食飯，都係為咗我可愛的表弟，佢話要食RIPS麻！

所以，一個鐵人都會被做死，返工多嘢做到死，又俾個老公點到死，仲激到死，鐵人都快爆啦！