港楊回憶，樂趣無窮！

今日上哂所有堂，仲調埋最後個堂，為咗可以去覆診。唐醫生先先問我有無唔舒服，我話頭重重的感覺好好多，但又未致於完全無，係我可以控制情緒的範圍之內，但係我左邊鼻就好似成日UN住UN住咁，一D都唔好受！

跟著佢就用燈嚟伸入去睇，話仲有D“蕉”，要清理好，咁我頭重的感覺會好些。清理就清理啦，今次唐醫生醒目咗，先又麻醉藥，點知噴完左邊又噴右邊，我立刻縮後個身，問清楚點解要噴右邊，乜唔係左邊有“蕉”嗎？醫生話，左邊的“蕉”大右邊少少，清清佢好D！咁好啦，又落麻醉藥！

初初醫生伸個夾入去左邊到，療咗好耐，就夾到些少“蕉”出嚟，因為有上次的經驗，今次我全程開眼咁望。然後到右邊，點知越伸就越入，整到我眼淚水都流，終於都夾到，一拿出來後，嘩！成一節手指位咁大，我立即同醫生話：「唐醫生，咁大塊，你又話好細？」本來嚴肅的顧問醫生忍唔住笑咗出嚟，答道：「你依塊都唔算大，我見過D仲大的！」

跟著，就夾左邊，大塊到成隻手指咁長同大，唉！我D眼水係咁不自覺咁流，一夾咗出嚟，又開始流鼻血！醫生話唔夾的話，傷口係唔會好的，依家流血，因為仲有一個好細好細的傷口，但係我咁答醫生：「唐醫生，我唔信你啦！因為你講SIZE的準則同我都唔同！」今次，醫生仲大笑添，好笑咩，扇咗我一鑊！唉！點都多謝佢幫咗我咁多！但係原來手術後都要受咁多皮肉之受，真係我意料之外！

晚上，我又要睇另一個醫生，咪就係牙醫。上星期牙齒敏感個到仲未好得哂，左邊門牙開始好，但係右邊門口仲有酸的感覺。輪到我時，醫生話再搽敏感藥，不用膽心，我有的不適感覺係正常，不過要長一點時間才會好過來！走時，原來唔使錢，真係唔使錢！上星期睇咗四百幾元，今日我以為會好貴，點知係唔使錢，等我仲好心急咁去拿錢添！感謝天父！