港楊回憶，樂趣無窮！

今日，將會結束我在心光17年來的工作與事奉，感覺良好，只是有很多捨不得，但人總要向前看！求天父加給我力量來照顧兩個小朋友！

我多年來的好朋友與好戰友！

我都無特別去搵一些好好的同事拍照，我拍我會忍唔住大喊，所以靜悄悄地返工，又靜悄悄地放工！

相信未來一年我都唔會再在“我的工作”內寫嘢！

今日上完上午課後，見到好多人叮飯，我做埋手頭上的嘢，預備想叮飯時，突然有同事A打電話來，話要開會，但我之前都唔知要開會，原來係臨時會。

係未食嘢的情況下，去開會囉，點知激到我CC吓！事緣放暑假前已係咁PLAN黃昏家會的事情，又話有另一個機構想借初中生，好，八星期，我借。點知開學前一星期，就話嗰個機構又唔想嗰段時間借，但另星期二又要“的”走我的中學生。但係星期二係團契，我梗係NEVER GIVE UP啦！然後同事A又約咗兩個唔同的武術師傅星期四嚟做活動，又要霸用我的崇拜時段及學生，我又一一唔得，最多提早半小時！

好，我一直都係有商有量咁同佢哋合作，今日特別要開會，A就話昨晚師傅唔能準時到，因等不到巴士又塞車，要轉龍師去星期二，五時至六時，今次我一口咬住唔放！有乜理由咁的，你哋自己攪活動，師傅要自己就時間，我好多個星期前已告知同事A咁編那些活動是不可行的，那時又話就唔到師傅的時間，突然一話等唔到車及塞車，就可以專星期二？咪玩啦！我團契都有自己的義工，又編好哂週會，請咗人嚟做分享！一於係咁黑面！

居然，同事B就出聲，話D學生好多活動，試過一日八種活動，要我完全取消星期一的晚禱(黃昏家會)，話CUT星期一係因為星期一早上已有早會，有乜咁的理由呀，你哋自己編活動，多，咪自己減囉，做咩要CUT我的嘢，其二係我哋係基督教學校，一個少少的晚禱都容不下？我點會將百幾年來的晚禱CUT咗佢，我點對得著天上的大BOSS，點對得著辛辛苦苦係香港工作了四十多年的宣教士！

當時同事C都幫口話太多活動，要我CUT晚禱，我FEEL到自己正在氣結，起身，走人！四人開會，三個不是基督徒，然後就係咁迫我去取消晚禱，跟本就無計傾，傾的話，佢哋都唔會明嗰迫切性！

走咗後，我係洗手間，本來只想冷靜，但眼淚就像水一樣，係咁流，係咁流，叫自己唔好再喊，仲流得勁，真的無鬼用！眼見就快上堂，走返辦公室，諗住安靜下來，怎知見到黃生，今次仲死，直頭喊到唔停，抱頭痛哭！咁多年的心結一次過爆出嚟！

外讀生唔去晚禱，我都係咁叫佢哋(就快出黃牌)，連老師都覺得晚禱可有可無，更可況可惡的學生呢？今日真的身心疲累

晚上答應去MORMOR及MORFAR家，因細佬明天返瑞典，但我真的唔想見人！車咗小朋友去他們的家後，我在車內等了成三小時，又車返佢哋返屋企！

天父呀，我疲倦了，真的很累！可否放多些合作的基督徒在心光，讓我們能一起有同一致的目標！

累！

我不是全反國民教育，但如成為一科的話，學生一定有壓力，又要評估，唔通要學生UM住個良心作答咩？

今日溝通會唔開心，開ACC MEETING時院長都唔係咁講，新校長就話：如果中小學會罷課的話，因我們是特殊學校所以唔使諗！佢真係用咁的字眼，咁人係要有彈性的，當年教育局突然宣佈停課，我哋咪又係遂個家長電話係咁打，更何況我哋只係得64個學生！

做教師的，成日教學生要有獨立思想，但係今天，我真正看到乜嘢叫大石壓死蟹，超反感！嗱，唔好話我話，如果真係中小學停課，我哋唔停的話，校友又會好多嘢講，就會又話心光無立場的了，就像我把晚禱改成家會，好多個校友打給我，話點解心光的宗教活動少了，用了我很多舌力，解釋只改了名，內容是信仰在生活上的實踐。做嘢呢，就要講良心，唔啱就唔可以用嘢遮住由得佢，應該又係宿舍唔會作而引起掛！唉！點解我仲係到，為何當天不交上早預備好的信呢？我太天真了！

天父，求你看顧香港的教育，這幾年真的有很多改變，外人也許不會明白，但我們在其中的教師，往往感到吃力，現在連表達立場都要受限制(係心光唔准講)，慘！但，天父，從另一角度來看，真的看到香港人的齊心，而且不會因阿爷有好處給，而唔出聲，求天父給香港的言論自由不被打破！

真係頂唔順，我都只係身為一個美勞科老師，為何會變咗做designer？明年心光115週年，居然唔係俾錢出面去設計，而係要我哋老師做。

下午係心光已經開始做，但做嚟做去都覺得好leung，完全無靈感，都係要返到屋企，用自己部電腦先好少少，記著，係好少少咋！

我設計咗兩個logo，同老公話，我的設計leung到爆，如果真係咁都用的話，真係有運行，以後做FREE LANCE，唔使返工。一個LOGO的版權都可以夠我哋半年的開資掛！老公話，如果得你一個有交呢？我諗唔會掛，新美勞科科長應該有義氣都整個掛，我今日見過佢的design！

我的設計，以簡約為主！(全部版權係我的)

已send咗給兩個老細，所以如有類同，都應該知我係原創人掛！

眼都盲，要訓！

創世電視，《愛地球觀察站》之“衝出黑暗”訪問已出咗啦，謝榮順及文俊的幫忙！

今天下午同德國差會老細們開會時飲了兩杯蒸餾齋啡，今晚頭腦好精神，但軀體超赲，未有睡意！

開會，令到我對事情有多些清晰的看法，也讓我內心的感覺越來越強烈，和老公分享了，得到他很大的支持！

DEPRESS 中！超亂！

係七月初，已經約好今日新舊團職嚟我屋企開會，本來係一早嚟，但後來晚上要帶佢哋去聽演唱會，所以改在下午三時先開始。

班學生都有進步啦，以前要開成三個幾鐘先得，今日兩個幾鐘就已經得。

本來係姐姐做大廚，我只負責兩個小菜，但老公帶咗兩個小朋友同埋工人姐姐去公園玩，打咗兩次都唔返屋企，我只好自己上，好彩寶刀未老，四十五分鐘就攪點！

仲有湯、菜未影，班化骨龍全部清哂所有食物，認真可怕！

跟著，晚上就帶佢哋去張崇基 張崇德演唱會，死啦！唔知係咪我脫節呢？點解佢哋講的笑話我唔識笑的？我只係識聽JIM JIM JIM咋！唉！我係老人家！

今天是寶貝熙銣出臏的日子，其實我真的不想看她過身的樣子，只想保留那甜美的笑聲，那八字腳的影子，只是，心裏很想送她最後一程！

看到她後，眼淚不停的流，見到她小小的嘴角週圍，盡是瘀血，應該是在搶救中插喉所引致的。她，很安祥地睡著了，就像平時在心光睡覺的樣子，很美。

熙銣，你看，那麼多心光同事過送你最後一程，真的多謝你帶給我們的歡樂，及看到妳的進步，令我們有著無限的鼓勵。相信你現在在天父的懷中，一定是和平日一樣大笑，行動自如，天父很愛每個小朋友，妳在那裏等我們，有一天，我們一定會重遇的！

天父，感謝祢，有一班這麼愛熙銣的同事們，請代我們先照顧她！

今日超多嘢做，做到我都無坐過自己個位到。早上要上堂，唔單只咁，仲要頂多一個同事的堂，跟著LUNCH要同佢哋練朗誦，之後就係精兵團的惜別會。完咗精兵團後，就立即到家政室幫恩福團預備惜別會食物，跟著當然係恩福團借別會啦！本讀走哂，我就同其餘幾個係到係咁執、執、執！到我返辦公室，已經係晚上七時，由早上八時半到晚上七時，我都無停過，返到屋企只係識得坐係到，任何嘢都唔想做呀.....................................

返到屋企都成八點幾，但第一時間攬住個仔，問佢：「​你估明天最後一日返禮幼，同埋最後一日見到班同學仔，你會唔會喊​吖嗱？」(問的時候，佢阿媽我好鬼無用哋想喊)卓希話：「唔知呢​？」。跟住我問佢使唔使帶多條紗巾返學，以防自己會喊，佢望住我​話：「乜你依家想喊咩？」，唉！我真係唔捨得佢班同學的媽媽們，​仲有咁多位有愛心的老師。感謝天父有你們的相伴，多謝你們這三年​來頂得順我個仔！

今晚係宿舍部的最佳宿生慶祝會，開心是婷婷同我一齊返工，我哋兩個全程投入地相處！

今日開溝通會前，我心情勁唔好，唔知點解，也許怕個會會長掛。但係我今日好好彩，下午四時十五分散場，原來仲有另一個會開，多謝哂！

事緣兩個星期前的溝通會，我無出席到，當日去咗尖沙咀的啟示研討會，後來同事告知，個日的溝通會去到成五點幾先放得工，我立即登到雙眼大一大，唔點幾？溝通會咋？

個日係要分享自評的結果，但都唔應該咁耐，而且聽聞有好多無謂的說話。依家開溝通會係一種折磨，無嘢講都要磨到你有嘢講為止，講嚟講去都係個幾個人，坐係到真的好辛苦。

今日仲為咗心光之夜講我個名出嚟，仲講得核突哂！唉！我唔係一個咁講求做咗的嘢要人哋係咁多人面前到讚的人，暗啞底我都做咗好多幫機構的嘢。唔通好以明天有緬甸嚟的客人，我係咁幫佢哋佈置個客房時(因為好多物資都係由我個到出)，就係個會到大大聲咁講出嚟咩？人做咗嘢，要對得住自己的良心，係得機構到做，就要以機構為重，我唔會好似依家的氣氛咁，唔係我負責的，一一免問。(除非我唔識啦，否則幫到就幫！)

依家心光的風氣就係擦鞋，係咪都要係會到嗱住個咪講嘢，表現突出自己，做人要做到咁假時，內心真的開心嗎？攞實力出嚟啦，唔好再用依D技巧，會令人討厭的，所以某幾個同事一攞咪的時候，我就頭痛，因為..................唔想聽囉！

諗咗好多日，忍咗好多次，終於係材藝夜後鼓起道氣，一定要同個同事傾傾先。近來覺得佢好似有意無意咁避開我，唔傾計，無眼神交流。一心諗住同佢傾計，一嚟睇吓係咪我自己講錯嘢(我直腸直肚麻)，又或者唔小心做錯事HURT到佢。而且佢近來病過，材藝夜個日見佢面青青咁，真係想同佢傾吓計，想關心吓佢。

但係，點知，好傷心。佢話：無架，大家係同事都唔一定有計傾，無聯繫咪無交流囉，無公事傾唔一定同你FD。嘩！我聽到好傷心，同佢唔係好親密，但係以前都有傾，有笑，有講八掛嘢，大家一齊研究玩淘寶，大家一齊講妹妹的趣事，但係為何近來會這樣？問佢係咪我做錯了，佢無正面答我，只係話無公作上的嘢咪無嘢傾，我個心嗱到一陣陣。都要同自己講一聲：「LET，GO。」我已經做咗主動，希望修補友誼，但對方這樣答我都會明白。

臨放工，發生第二件事，我真係覺得心光多怪人(有時都會包括我在內)，點解去睇一件事時唔去睇整體，而第一時間就話個同事有問題，今次我一D都唔放過駁嘴，就算同你十五年同事我都係咁話，由乜理由咁樣講。你哋個個都未注意到個細路時，我已提出佢有問題，唔係我同佢爸爸傾過電話有共識，要佢係學校做埋功課先走？你會攪得點要佢清哂所有功課？飲水要思源，我最唔鐘意人成日要領工，錫細路我一定會，但係都要教的，唔係縱就得，要縱的話，佢屋企人縱就得！

經過昨天一日的勞動，成個身體攰到不受我控制，好好好好好好攰，個盤骨位攰到不得了，生兩個小朋友個盤骨都無咁痛，今次認真大整估！

幸好昨天沖風咁上哂五堂，今日在下午先開始上堂，我坐係OFFICE，未試過眼皮自動會關上，連去拎水都唔想，總之就係唔想郁啦！

到下午上課時，我才開始好少少，自己點都要集中精神，唔好再呻，做嘢啦！

今晚係心光才藝夜，一個字，「亂」，真的亂到七彩。應該睇住學生的人，唔去睇，就坐係到傾足幾粒鐘，應該做嘢的人就係咁企係到扮做嘢，心光真係養咗好多奇人奇事。

相比起阿BEN同阿倫，我真係負責好少嘢，同校友一齊獻詩，之前係咁練朗誦，到個日要幫手化妝，預備朗誦個兩位同學STANDBY。唔講起由至可，一講起就把鬼火，有人同我哋一齊幫學生化妝，但係佢一見到派俾佢的學生係有好多瑕疵的時候，居然，真係咁都做得出，居然就咁搽兩吓粉底就算，乜都遮唔到。救命呀，做嘢唔好咁啦，我把火得嚟，就自己動手再化過，話哂佢都係叫做負責表演的學生吖，咁樣對佢好唔公平。

我真係好鐘意同佢哋玩造型，但係今次唔使咁多特別的造型(我記得第一次係演藝學院時，我哋幾個負責化妝的幾個鐘都未停手，個個造型都唔同，及要特出)，最好玩就係要化兩個魔鬼，真係好得意同好好玩！

院長秘書一早叫我六點幾就要出去招乎客人，我咪出去囉，點知一見到院長：吓！我哋兩個件衫差唔多，咁就一定係佢個件靚D啦，有花紋的，我就只係一件普通白色，但就好似囉。院長話：嚟，嚟，嚟，一定要影張相為證先，咁都會咁似！真係好笑，點知，係我哋影的時候，有一個好厚面皮的人又話要嚟同院長影，我立刻：走人！超級唔鐘意行討好路線，我有我的獨立思想及做法。

要開場啦，要返後台做嘢，到校友獻詩個PART係我最怕的，因為第一首歌突然要由4拍轉做3拍，我次次都係第二句先跟得上，不過真係有驚無險咁順利完成。之不過，到我要集合朗誦的學生時，其中一個搵嚟搵去都搵唔到，我係後台週圍咁搵，都無人答我，也許個個都攰到不得了，個個都呆呆的，答都唔想答！後來靈機一觸，會唔會上咗二樓呢？於時開咪CALL上去，又親自上去搵，先搵到咋！另一個朗誦的學生就要極快速咁同佢換衫，同D天王天后一樣咁快，跟住就推佢出場。兩個朗誦完，我真的無哂力水，任務完成。幾日都諗起才藝夜就頭痛，終於可以曲終人散。可惡的是....................第二天一早六點要爬起身返工，邊個編到咁的！

我諗住輕輕地，拎以前部傻瓜機去影相，但係去到後，真的好後悔無拎到單反機去！哎呀！

今日係我最後一日上啟示綠，上完後最熟係乜嘢？咪就係學多咗好多SIMPLES，及覺後約翰好勁，乜都可以俾佢用數字同推理推一餐，但係就讀到我哋頭都大埋！呼！

今日一路聽研討會，內心有很大的爭扎，當聽到講員話一個基督徒在世的位份是甚麼呢？約翰用很多現成的例子要叫基督多裝備，我在內心裏禱告，求天父給我做一個馬大，我想用多些實際行動去服待人，現在太多文件要處理，太多不是我範圍的雜務要做，我想多些做有建設性的幫助。但內心裏就一很溫柔的聲音告知，要我不但像馬大的實際行動型，也要像馬利亞一樣去關心及聆聽。關心唔係我唔想去做，而係現代的年青人都唔想去處理自己內心的問題，只是希望永遠都SURE WIN，唔睇多方的問題所在。而且在心光做福音工作真的很沒有SUPPORT，永遠都只是我們三人去負責，這樣的環境真的令人疲倦。

但那聲音還是很溫柔及堅定地提醒我，主阿，我需要時間去定次的定位，唔想做到無哂MODE時仲做落去的話，只會影響到祢的福音工作。所以今日的一D都唔順服，只有自己的思念，我需要時間去消化！

今日除咗返教會之外，就係有一個好親密的舊生洗禮，相識咗好多年，終於見到佢洗禮，個一刻真的好感動！