港楊回憶，樂趣無窮！

  Unbelievable, Hayden got improvement award from the school! 咁鬼曳的仔都有進步獎？難以置信！

  十二月係我的C忙期，別人係咁玩及期待聖誕的來臨，我就忙到癲。好啦，終於忙完公事，今晚先有時間睇卓希的考試範圍，簡直想暈，範圍多就間間小學都差無幾，而係我個仔成日溫書唔合作，想到這裏，好想大喊，要睇佢面色仲辛苦過我教學生。求救呀天父，給我耐性與力量！

今晚我返到屋企，跟功課時，就見到卓希張默書，嘩！老師工作效率好高，即日默，就即日改同派，如我所料，個衰豬一定係九字頭，又係錯粗心大意，由得佢，等老師教佢啦！

近來同阿仔溫書溫多咗，發現佢有時將d同b攪亂咗，昨日開始溫個九個詞語，佢又將“味道”的“味”字，同“舌頭”的“舌”字攪亂，成日都寫成“舌道”“味頭”。

今晚又再溫一溫時，又係依兩個詞語瀘事，我諗每日一默都係咁上下，阿仔太粗心大意了，我又猜，到底佢有無讀寫問題呢？一定唔迫得！

今晚比平常早咗半小時返到屋企，阿仔今日得兩樣功課，跟咗佢的功課後，我仲有時間整明天佢哋的茶點：橙味朱古力海綿蛋糕

卓希只係做咗小學生十多天，我已忙到無命！時間上真的不夠，到我和老公放工後返到屋企，都已經七時半，每日只有一小時跟阿仔的功課(仲要有時間沖浪呢！)，趕佢八時半刷牙上床，九時至九時十五分佢一定會訓咗。試過唔夠訓，早上就扭忟，起咗身，行到走廊都坐咗係地到→訓番！所以我好緊張阿仔準時訓，唔想佢唔夠精神。

記起阿仔第一日返學，意思係DAY 1，我一D都無諗到第一日返學就有四五樣功課，係電話內，阿仔仲話得兩樣，點知，返到屋企，得我一個會打開本手冊，一睇，嘩，成四五樣。最嬲係連老公都信哂個仔得兩樣功課，手冊都無打開過，個晚，對著楊家兩個男人，我癲咗！係癲到老公怕我會傷害個仔，跟本我自己都未能適應到，咁大個人自己又係教師，手冊又唔跟，阿仔完全係做功課唔專心！

只係教阿仔睇每日有幾多樣功課依個習慣，教到我嘔哂血，也是因為這個問題，他給我狠狠的打了！話說9/9(星期五)，那天放工後，我坐在巴士上，想了解他有幾多樣功課，便打電話返屋企，當時他還很認真地答我：「嗯，等我睇吓先，兩樣！」我的心一聽到兩樣，當然係高興啦，可以去HAPPY FRIDAY，但回想自己也是教師，有一個週未的話，點會唔俾功課。一返到屋企，一睇，手冊都無打開到，一數，有六樣！我打個仔，唔係因為佢唔識(佢唔識係應該的)，而係佢睇都唔睇，就講大話！自此以後，我係電話到一問佢，佢就會睇手冊先答我！

又試過係IP CAM到叫工人姐姐放好，我用IPHONE影咗張相後，用電話同阿仔處理功課，因為佢逢星期三仲要學PHONICS，要做一個萬能媽媽真不易，所以離去的心更堅決，求天父指引我！

另一樣嘢，就係要話吓個教育制度，卓希九月二十六日已經要中文默書，仲要背一大段，然後默詞語！星期一默中文，星期五背默聖經金句。根本，每日我放工返到屋企，就只係跟到功課，所以默書的溫習都只係週未做，卓希的舊同學做到預習，但如果俾我要同佢做埋預習，即是週未都要係屋企困獸鬥，無哂玩的時間。依家做小一真係唔容易，睇阿仔書的課文，其實應該係我細時小三的課文，記得小一時我都只係學“快快樂樂上學去”，邊有咁多嘢要學，又要做補充練習。全都係依個教育制度玩C人，小三又要測，小六又要測，咁小朋友咪要由小一已經要操囉！見到阿仔咁，真係發覺依家做小一真係唔易做，點解會咁架？如果我係佢，我會好怕返學！禮賢都已經係一間唔算谷的學校，都忙到咁，如果去到第二間，我諗阿仔晚晚都唔使訓！

所以，即使佢依家連續個個星期都有不同的默書，我全都拆開同佢溫，唔想俾壓力佢，只想佢做一個誠實人！

拆開溫咗三個星期，終於100分！
第一個星期週未背哂佢，第二個星期週未默前三行，第三個星期(即今個星期)就背默哂成課書，第四個星期週未(下星期)就要默第四課的詞語！

今日下午我同老公講，唔得啦，我一定要去走走，唔可以再困係屋企，所以一家人去咗西貢到TEA，係車到，我都要同卓希串串英文字，將佢要默的英文解完又解，串完又串，無法，時間又唔多，但又唔可以成日困係間屋企，只好一路走，一路教！希望阿仔習慣後，能輕輕鬆鬆地學習吧！

我家豬仔希上小學啦, 由佢細細個到小學依條路, 真的不易走, 阿仔, 加油, 俾心機學習, 及俾心機享受小學生活.

佢7:10am就上樓車, 真好, 我哋兩公婆一齊帶佢落樓, 老公先帶佢去水池個邊, 我就去攞車, 然後停係校車附近, 老公就走人先, 我同阿仔一齊等校車, 睇住佢上車我就飛車返工, 時間啱啱好, 感謝天父, 我又可以盡一個媽媽的責任去帶佢啦!

大半年前，個個禮賢的媽媽們已經係咁講有關小朋友們的畢業典禮，今日，終於來臨！

前兩晚我真係好似無訓過(我諗我食藥食錯咗時間，所以晚上訓唔到)，今日六點幾已經起身準備自己，但都唔知點解，我都係最後一個先攪點！

班小朋友一進場，我已經好感動，好好好好好好想喊，但係死忍，一嚟唔想個妝花咗，二嚟怕俾媽媽們笑我！哈，我都怕醜呀！

禮賢真係對每個小朋友都好細心，好週到，雖然佢本來話9:10AM才開禮堂門，但見快下大雨，便請家長們由另一道門進入，所以，本來我哋由第一幾，郁一郁咗個位後，就變咗排第三，可以坐係畢業班小朋友後面的第一排，當然影相無阻礙啦！

不過今日妹妹係咁要我抱，所以影相的責任都落咗係老公身上！

跟著就去咗帝京酒店有謝師宴，較長，但係我真的好欣賞上午班的小朋友，無論係教會的畢業典禮好，定係謝師宴好，佢哋都坐得好乖，相反下午班的小朋友就唔係好聽話，老師同園長係台上係咁同佢哋講要安坐係自己個位到時，佢哋都唔聽講係咁走圍跑，所以黃老師嚟我哋個圍時問卓希去咗邊，佢當時去咗洗手間，黃老師都話乜佢可以咁乖坐係到，我開玩笑咁講：因為我係到囉！(大笑ING)

另一樣令我感動的，係卓希的正式畢業相，嘩！靚到不得了，好似大學博士學位畢業咁！

晚上約咗成三十年無見到小學同學聚舊，雖然大家話當年，但始終都有：我不屬於這裏，的感覺！但，是很開心的，如果環境靜些會仲好！

今晚真係超忙，MORMOR MORFAR嚟我哋屋企，因為要同MORMOR慶祝生日麻！唉！我明晚又要開會，MORMOR又約咗FRIEND，所以咪今晚囉！

卓希昨天從學校帶了畢業袍回來，但我一直都忙著，沒有時間理會它，今晚趁兩佬在我家，一齊嚟影相啦！WAKAKA！

其待已久的禮幼遊藝日又到啦！

卓希豬今次要扮：巴斯光年，我真係好服禮幼的老師們，佢哋真係教到D小朋友好乖同埋好叻，真係好好睇，希望訂咗的DVD快D到手啦！

今次連MORMOR都嚟埋，一齊睇，大家由開始就笑到結束，真係好開心！

返到心光，橫點都帶咗相機同鏡頭，我就係咁影好耐已經想影的鳳凰木及木棉樹，影完之後，我面又痕，鼻又痕，真係痕到不得了！

今日卓希去九龍塘宣道考試，我同婷婷係副堂到等(老公要返工)，都要等成四十五分鐘。卓希出嚟後，話我知佢哋入到課室到，先先要寫自己個名，然後就每人計一題數，跟著就係英文，我諗卓希一定考唔到，因為去到英文環節，佢話都唔知對方講乜嘢，所以唔知自己應該做乜嘢去逹標！

好彩卓希入去考之前我同佢講，考唔考到都唔緊要，最緊要盡咗自己的力！考唔考到爸爸媽媽都一樣咁愛佢，佢就舒懷咗好多，因為佢今日個人好緊張！

算啦！今日同佢去考，都係想佢有一個經驗，同埋佢阿媽我想睇吓佢的實力去到邊，依家仲好，起碼知道阿仔的英語CONVERSATION要加強！

跟著我哋返咗屋企，三個都好攰，好似無乜力咁，無去過街，係屋企整PIZZA食！食完先諗起唔記得咗影相，下次再有機會啦！

今日係自選而又可誇區的日子，我哋無幫卓希申請誇區，因為個心都係禮賢到，只係抱住試吓啦的心情！

到晚上約咗一班心光的舊同事一起到九龍城食飯，真係超開心，好耐好耐都無咁大笑過，我好掛住佢哋呀，心光依家越來越無咗歡笑聲！

今日下午食緊突如期來的政治飯時，卓希打電話給我，好開心咁話：「媽媽，老師頒咗個勤學獎給我呀！仲有好多禮物！」真係難以置信，禮賢的老師們真係好，相信個個小朋友的獎都有唔同的名堂，應該諗到頭都爆！咁，老師幾時會頒埋俾媽媽們呢？辛勞獎我都照要！

今日係星期五，我返十二點，但係一早就起咗身，咪又係為咗我個仔囉！佢學校綜藝表演，佢做如來神掌組，我一定要去支持吓的。

為咗同阿仔有近距離的接觸，報咗名去做義工老師，真係超好玩！又幫小朋友們化妝，又幫小朋友們著衫，真係好得意！

真係好好玩，攪到我下午真係無乜心機返工做嘢！

卓希明天學校要去動植物公園, 為咗做專題研習要搜集資料, 但係明天係最凍, 真係怕佢凍親!

卓希同學仔的媽媽係fb到話要帶暖的嘢食, 吓, 無我係到, 佢點攪得點個暖壺?所以晚上臨訓前就嚟一個特訓, 要佢學識開同關暖壺及熱水樽, 我最怕佢倒哂的話, d汁係書包到, 咁就要報銷, 唉!為何每次佢學校有大型外出的function時都係凍凍凍?真係唔多明.

卓希的巴士燈籠終於完成咗!

唉!點都要"請搶", 佢識做的嘢, 全都由佢做, 其他的都係我幫!

今早卓希都未上校車, 個巴士水潑已經被佢整掉咗, 我都無眼睇, 等佢自己返學校處理, 佢要學自己負責番自己的嘢, 我已盡咗最大的努力.

今日返教會，又係為咗卓希豬，去咗靈匠堂，仲有葉雯一家由加拿大返港，好開心見到佢哋。

跟著我哋就要趕返屋企，因為去個party，一個升班的party。今次依個party的攪手係我，之前我同李老師傾計的時候，突然有感動，因為豬流感突然停課，班小朋友突然無得見，所以好想攪一個升班party，順便請三位老師參加，等班小朋友有機會同老師講“再見”。

我都唔係做好多嘢，只係負責教整腸仔牛角包，仲要帶埋我的光波爐。不過，由於有第一次見面的經驗，我就做咗一d名牌，等每個人都掛係個身到，容易認到係邊個打邊個。仲有就係特別神秘嘉賓李老師。真係好開心，唏朗媽媽仲即埸教英文，現在好多人學的phonics！

我好攰，仲有d頭重重！最失敗係一張相都影唔到，希望可以集合哂所有媽媽們的相，整理好啦！

「榨果汁活動」記錄表，卓希好鐘意做，因為又有得玩，又有得食！

瘀黑

本來都唔想upload張相，真係幾肉酸，放咗工，返到屋企後，成隻腳掌都黑哂！

由於我有好多過膠片，咪將所有字咭過膠，日後妹妹都有機會用的！

但係次次落樓下過膠都幾貴，所以決定自己買部過膠機。係FOTOMAX見到依部，仲有切割器及圓角器送，底！

著手開始整埋英文啦！

我依個媽媽真係唔係做得咁好，因為卓希由返BB班開始，我都唔係點跟佢學咗乜嘢。不過由於佢慢慢大個，要好好的同佢溫習，但係如果用一般的方法，佢係坐唔定的，所以我諗咗一套字咭遊戲出嚟，為咗要鞏固佢係學校學咗的嘢！卓希最鐘意同佢爸爸玩依套字咭！

卓希係學校學咗好多詩歌，試吓uplaod先！