港楊回憶，樂趣無窮！

好多日都無寫BLOG，係因為無乜心機寫，而且又無力寫，事緣係星期三好開心咁早放後，就接到老公的電話，話婷婷妹妹發高燒！個心立刻沈咗落去，唉！又嚟一鑊乜嘢呢？返到屋企，見到妹妹個人都好精靈，又玩得，又食得，只係發燒，咁個心都定咗D！

點知，去到七月一日，佢的燒無退過，仲成日好癡身之餘，又扭計。本來一早就幫卓希約咗教會牧師個仔去玩，但係點知我同妹妹無得去，只係得卓希同老公去，連pizza都無得食呀！

到七月二日，一早起身我就頭好暈，天璇地轉咁，然後一起身就去痾，痾咗幾次，係咁出冷汗，但係無辦法，都要頂硬上，因為有好多嘢要去做！但係個人就頭重重咁，晚上一早就去訓啦！妹妹是日就好似退咗燒，日間都無燒過(姐姐話)，但到晚上我在家時，就覺得佢有少少燒，38點幾，都係食藥為上！

到咗今日，妹妹真係退哂燒，不過我就好攰，好似傳染咗俾我咁，無法啦，佢真係好癡身，我哋兩個的關係真的非比尋常！

到咗下午，老公諗到不如去上山玩水，咁我哋就去咗沙田，寶福山後的城門水塘水霸到玩水，好開心，兩個小朋友玩到唔願走，但係妹妹只玩十五分鐘就要佢換衫，卓希就可以多五分鐘，因為佢哋的身體真係較弱，唔可以玩得咁盡！