港楊回憶，樂趣無窮！

今早一早去咗油塘掃墓，然後去德福飲茶，跟著卓希就同堂家姐去嫲嫲屋企玩，我哋就帶婷婷返屋企。都係休息為主，晚上正在好忙咁上網，淘寶網，幫妹妹買定返學用的KITTY用品及茶點用品，嘩！多到都唔知要邊樣好囉！

今日婷婷兩歲啦！回想兩年前的今日，真係死過番生，生阿女時係咁出血(我唔知算唔算血崩)，無咗多過800CC的血，差點止唔到！

今日，返咗教會之後，我哋就返屋企，預備生日會。始終婷婷都未有自己的朋友仔，所有玩開的都係卓希的朋友，又或者係兩個堂家姐，所以生日會都係自家人！

睇吓！真係大個女啦！

近日天氣轉嚟轉去，我哋一家四口敏感症又發作，鼻水長期流，我依兩三日塊面又紅紅地，仲腫到一舊舊。最慘就係兩個細路，係咁鼻水倒流，婷婷妹妹昨天開始咳咳哋，昨晚就哮喘病發作，真係慘，見到佢喘得咁辛苦，我真係寧願辛苦嗰個係我！

好彩，我哋之前拎定D藥放係屋企，所以可以用住先，但係成晚見到妹妹呼吸咁辛苦，真係慘，正考慮會唔會買醫生以前教用的噴霧式的藥機。但係如果有一段時間唔使用的話，又會浪費金錢，但係要用的時候，妹妹又會舒服D！唉！點算好呢？

昨晚好夜先訓，因為要搵我細個時的相，卓希朋友仔的媽媽們成日讚妹妹，又話佢似鬼妹，又話唔知係咪係產房調轉咗，所以我要證明佢同我細個時好似樣，咪係咁搵！

原來我都無乜相，個時要影一張相都唔係咁容易！

POST咗上FACEBOOK，有D朋友就話似，但係我個多口妹就話一D都唔似，因為我光頭的！哈！

唉！我都知我無頭髮的啦！所以一直都唔POST出嚟，但係今次真係要講清楚，婷婷係我個女嚟的，就算真的調轉咗都唔會俾返人的！哈哈哈！

今晚輪到婷婷妹妹有D唔對路！唉！病魔何時可以離我家而遠去？

雖然探咗幾次熱，都未到發熱嗰個度數，但係都係車邊，好攰呀，一個未完全好番時，另一個又開始？

妹妹昨天接哥哥放學時，不小心摔了一交，就此變咗花臉貓，直頭成隻大花貓！

今晚放工，去德福買麵包，順道買咗蛋橽回家，睇吓卓希食成點？佢只係食咗個牛油皮，中間最好味的蛋就話唔知，都唔識食！

卓希係地上玩車仔，婷婷有樣學樣咁玩，簡直笑到我肚痛！(工人姐姐無理醒目，隻腳係咁咗住！)

我昨晚明明打咗日記，仲打咗一大篇，點知要upload時，無哂！有見及次，就走去訓，要慳番d精神同小朋友玩仲好！

婷婷妹妹退咗燒啦，不過無出到疹，應該係吽緊出牙仔，因為佢忟過忟薑，連哥哥希都頂佢唔順，今晚直頭煩到我謝哂！

老公一定好掛住我哋，sms啦，電話啦，係咁同我哋聯絡。佢話個學生無事，歸咗隊，真係感謝天父，如果唔係，成隊人都要隔離的。不過，我都幾享受係屋企話哂事的時間，因為chem sir唔係屋企，同卓希無產生化學作用的時候，佢係可以做到一個好乖又無乜扭計的小朋友，仲會好可愛咁幫番我轉頭。至於妹妹，由於剛剛燒完，佢忟忟地，而發現佢有可能又出牙仔，所以扭我扭多咗，不過都平靜地過咗兩天啦！

好，又去影相啦！

今日我放工返嚟，嫲嫲話我知，婷婷妹妹好似發燒，一探，真係有，咁就食退燒藥。不過佢又訓得、食得、玩得，樣樣都得，又無鼻水又無咳，都唔知點解會係咁。

到晚上六時半，今次又高番燒，38.9度，嗱嗱臨同佢食退高燒嗰隻藥！唉！點解次次都係老公臨出trip之前，兩個小朋友都會病一病，超煩！

婷婷妹妹依家用緊的車仔，係卓希四年前開始用的。當時我都諗住生第二個，所以卓希兩歲後我便收起咗，為咗可以俾妹妹用，但係真的人算不如天父算，近來架車仔壞壞地，都係時候買過部。但係bb的嘢真係好貴，所以我又發揮我的小宇宙，係淘寶係咁搵，終於俾我搵到部唔係好貴的combi車仔，圍起港幣都只係五百多元！

部舊車仔好貴的，因為當時卓希仲細，希望可以有架的避震會好d！

多謝豆父，老遠由廣州幫我哋拎部車仔返嚟，第時一定請你嚟我哋屋企食嘢！(哈)

新車仔真係改良咗好多，連後面個袋都多咗好多！好嘢！(不過要防止工人姐姐係咁放嘢入去)

新舊車仔大比併！

今日返工前，同妹妹影咗一d近照，真的好得意！

卓希近來都叻咗好多，好多嘢都自己做，不過都係嗰句.................................同老公一樣，要叫好多聲先肯去做！

前兩天妹妹發燒，到退咗燒的第二天，就即是今日，佢成身都出紅點，唉！原來佢出玫瑰疹，個人忟到不得了，成日都要癡住我。晚上同mormor，morfar係我哋樓下食飯，但唔想妹妹出去，就留佢同me姐姐係屋企。返到屋企，見到佢眼濕濕，原來我哋落咗樓咁耐，佢就喊咗咁耐，仲週圍搵人添！唉！第時我返咗工，點算？老公話要高薪請返tun返嚟，我唔想，佢應該去吓人哋其他屋企試吓，唔使成日話我惡！

我同老公講，不如我唔做嘢，湊返兩個小朋友，但係佢唔答我！煩.........................

昨晚返學時，老公send sms話我知妹妹有牙，我好似耶穌的門徒多馬一樣，要自己睇過先信，因為之前幾個月姐姐們已報流料，所以要我親眼睇過先得。

但係昨晚返到屋企兩個小朋友都訓哂，今早我又要返工，放咗工後，拿著相機，決心要影妹妹的牙，點知攪咗好耐，妹妹忟哂都影唔到，終於都放棄！

估吓妹妹出幾多隻牙？登...........登..................登..........................登....................................係一次過六隻，六隻呀，上面四隻，下面兩隻，忟過忟薑！

以後，就無得再叫佢做“無牙妹，舉手”！(以下影片，係今早返工前影的！)

婷婷妹妹學行路，真係超得意！

近日芍婷妹妹識聽好多嘢，不過，也是由於佢識聽多咗，脾氣也因此大咗。

 妹妹已經一歲，係我的字典裏，一歲就已經要訓練佢的責任心，所以晚上臨飲奶之前，都會要兩個小朋友執玩具，這幾天我放假在家時，要他們執玩具時，卓希就會慢十拍咁執，而妹妹會點？咪就爬係地上，發脾氣唔肯做，仲踢腳添。

然後，我抱起妹妹，把玩具拿到她手裏，要她負責放係玩具箱到時，佢居然拒絕拿玩具，然後又唔肯放到個箱到。就算被我迫放咗係個箱到時，佢都會係個箱到拿回同樣的玩具，跟著扔係地面。我一於有理無理，再捉住佢隻手，要佢再執過。經過幾天以來的訓練，有明顯的進步，不過都係唔想執。依個女真係難教過個仔，卓希個時我都係教咗一個星期多少少，佢就會以後自己執。真一小姐脾氣，我會一一教過佢。

今日係婷婷的一歲生日，好開心，開咗兩次PARTY，一次係一早係mormor屋企，另一次係下午係我哋自己的屋企。

諗番起一年前，真係死過番生，生都唔係最痛，最痛係醫生係咁“抄”邊到出血最攞命。

一歲生日會：沙田

一歲生日會：麗晶

妹妹前陣子開始用學行車，今日已經行得好好，好可愛！

今日返咗教會之後，係屋企休息咗一陣，就出發去柴灣，約咗親人飲茶。好開心，雖然唔係好多人，不過都有講有笑，希望有多D咁的機會！

跟著返屋企，去爺爺嫲嫲屋企之前兩個小朋友要洗澡，係等緊卓希豬洗的時候，婷婷妹妹就上咗大床到玩，其實佢晚晚上咗大床後，都係要玩同一個遊戲，就係佢自己離遠咁企係到，要我大大聲咁話佢，佢就會好高興，真得意！

婷婷妹妹開始大啦，又自己學行同企，係時候要放少少錢係佢的衣飾到，所以傾盡我所能，係淘寶網到找又平又靚又有牌子的衫仔，真的好靚同得意！昨天訂，今日收到，超快！

件褸係諗住秋天先著，不過真係好靚，忍唔住手買咗，好平，幾十忟！對鞋本來我訂15碼，過咗數後佢先話原來無哂15碼，只得19碼，唔怕，妹妹大咗就可以著！

我今晚捉住個頭話：「頭痛！」時，妹妹又學我，真的好攪笑！

佢今晚拍手時，都可以在短時間內不用扶住，我諗佢就快學識自己企啦！