港楊回憶，樂趣無窮！

係網上看見這張相，立即諗起第一次睇係喺滿華樓，真係鐘意到不得了，所有歌我都識唱哂，有機會都要介紹俾屋企兩個小朋友！

依個農曆年真係凍，今晚仲只得7度，真係凍到不得了！

祝大家新年快樂，主恩滿溢！

唉！自從卓希豬上咗小一後，我的世界就只有兩樣嘢，返工，返屋企跟功課、默書、測驗及考試。到自己可以坐到埋部電腦時，就完全無哂電，又點會寫到BLOG，但係個心成日都好掛住，真係好想有系統地記錄所有嘢！

本來今早我哋三個福音事工部同事要去開南區教牧同工會，但昨晚臨時收到電話，我開唔到會了，要返心光處理埋下星期115感恩崇拜事情。又係趕呀，趕！跟住我就約咗光龍，交嘢給他之餘，車埋佢過海。

我先泊番好車係九龍灣，然後要去做婦科CHECKING，近來小肚以下位置痛的次數多咗，都係時候要去睇睇，今日睇番RECORD，係三年前生完妹妹後睇過，跟住就無啦。

睇完醫生後，我才食今日第一餐，但就出事啦！

話說我由星期六開始，個肚都成日痛，然後又肚痾，唔多，每日兩至三次，昨天好些，只是一次。滿以為好緊，點知今日食完咁簡單又健康的一餐後，肚子在半小時後立即痛，係咁去洗手間，好彩，我係行慣街的人，洗手間方向立即知道！

返到屋企，都仲有痾，同埋今日仲有想嘔的感覺，唉，年紀大，機器壞，真係好離譜的話，請假都要去睇醫生！

今日我都有收穫，睇完醫生後，又去完洗手間後，去咗買一樣我諗咗好耐的嘢，就係美容儀器。我已經無去美容院做面部保養好耐，由有卓希開始，只是間中去一兩次，一嚟貴，二嚟真係無時間，三嚟有咗兩件小朋友後，都無乜多餘錢用嚟自己花，所以決定買！

la mente g7

藉人體耳朵聽不見的高周波震動，對肌膚進行有效保養。雖然聽不見，但係我每次做到個鼻時，都會感受到電流的，就像以前去美容院做一樣！

離子導出後，由部機幫助去除角質，以及殘留在肌膚的髒物，深層過peeling。

用咗白色的紙巾對比，嘩！真係好dirty！

依部機仲可以有紅外線，提升及收緊肌膚！我要多些做！

今年聖誕節，兩個小朋友大收穫，有好多聖誕禮物，感謝天父，兩個小朋友真係多人錫！

我同老公，就只有以下幾樣嘢，真係越老就越無乜禮物添！

P.S. 好忙，返工又忙，放工又忙跟卓希功課同默書測驗，好耐都無寫BLOG，今晚要試追番寫，真係攞命！

一如以往，平安夜都係去爸媽屋企，不過今年唔係咁開心，因為同媽媽有吵嘴，唉！真係難服事！

爸爸個樣係咪有孫就萬事足呢？

人人話如果我係埋依張相到就PERFECT，但係我寧願做影相嗰個囉！

兩個小朋友幫MORMOR手派禮物！

祝大家聖誕快樂！

卓希同我近來鼻水超多，個個都話天灸好有用，就俾佢試吓，希望有用啦！

今日冬至都要返工，因為超超超多手尾要跟，唔做的話，一月返到工就會死得，而且有幾個週會表想係下星期開會前整咗佢，開會時用的！

咁兩個小朋友又鐘意去心光玩，成個心光都無哂學生，連七日宿嗰D都走哂，兩個小朋友+工人姐姐成日都係四樓到玩，仲話唔願走添，激死！

┏┯┓┏┯┓┏┯┓┏┯┓┏┯┓┏┯┓♥(\ /)
┠大┠┨家┠┨冬┠┨至┠┠快┤├樂┨ღ( . .)ღ
┗┷┛┗┷┛┗┷┛┗┷┛┗┷┛┗┷┛c(”)(”)
…♪♫•.•°*°•.¸¸. ♡ ℒℴve ♡ .•°*° ♪♫•*¨*•.¸¸♪♫

  十二月係我的C忙期，別人係咁玩及期待聖誕的來臨，我就忙到癲。好啦，終於忙完公事，今晚先有時間睇卓希的考試範圍，簡直想暈，範圍多就間間小學都差無幾，而係我個仔成日溫書唔合作，想到這裏，好想大喊，要睇佢面色仲辛苦過我教學生。求救呀天父，給我耐性與力量！

同妹妹玩午睡，點知我訓著嗰個係我！

今日崇拜後，我哋一家去咗石梨貝水塘，為咗要出外透透氣，天氣真的好好！

去到一半時，有一個可以玩溪水的地方，我哋就留係到玩一陣水！

點知，事情就係依到發生，初初係卓希話要小便，然後妹妹都話要，但她突然肚痾，量唔多，但已令人擔心，因真的好以卓希上次咁！

晚上都照樣去嫲嫲到食飯，但妹妹初時無胃口，要我氹佢先肯食。點知，一食完飯後，佢就話肚仔痛，要痾大大，又係一輪水大大，唉！我好驚呀，好似卓希咁的話，大人都無命！

婷婷妹妹快些好番，唔好有事呀！(不過晚上佢放的屁，又係勁臭，同卓希上次又係一樣)

話說星期三晚卓希出”風爛”，我都未返到屋企，老師已經帶佢去樓下到睇醫生，當時醫生發現原來卓希下面兩隻牙出咗新牙，但前面兩隻郁都唔郁！

為咗免得前面兩隻阻礙到後面兩隻的發展，只好去牙醫到脫咗佢，成惠$560兩隻！

之前買定的乳齒盒依家有用啦！今晚要先浸漂白水(1:1)，明天乾咗後，可以放入盒啦！YEAH！

卓希不知幾開心，因為佢身邊好多舊同學都已換了牙，只有他無動靜，今次可好了，他成天都好開心咁笑，臨訓前仲話：我真係大個仔啦！(太好笑了)

真係頂唔順，我都只係身為一個美勞科老師，為何會變咗做designer？明年心光115週年，居然唔係俾錢出面去設計，而係要我哋老師做。

下午係心光已經開始做，但做嚟做去都覺得好leung，完全無靈感，都係要返到屋企，用自己部電腦先好少少，記著，係好少少咋！

我設計咗兩個logo，同老公話，我的設計leung到爆，如果真係咁都用的話，真係有運行，以後做FREE LANCE，唔使返工。一個LOGO的版權都可以夠我哋半年的開資掛！老公話，如果得你一個有交呢？我諗唔會掛，新美勞科科長應該有義氣都整個掛，我今日見過佢的design！

我的設計，以簡約為主！(全部版權係我的)

已send咗給兩個老細，所以如有類同，都應該知我係原創人掛！

眼都盲，要訓！

卓希昨天已經只係痾水，為咗安全起見，今日都要佢留係屋企，以免個肚有動靜。工人姐姐話卓希今日識得話要去開大，跟著自己係洗手間到攪得點，唔會好似之前幾日咁賴到成條褲都係，即是佢已經踏入開始好的階段！

依個仔有時都幾底錫，係屋企我都影咗練習佢做，免得無所事事。咁，佢又出奇地好乖，係屋企喺咁做，教我如何不愛他呢！

但願我能係屋企好好咁照顧佢！    

有人做媽媽的練習，成日出現咁的字眼：「我不知道」！笑咗出嚟！

跟著，又會見到個「楊」字時，又寫道：「楊卓希的楊」，笑爆咀！

今早，我都未醒哂，已經聽到老公話卓希又痾過，佢大大話話都痾咗成三至四次(已經少過昨天早上)，又係水PAT PAT咁！

終於都要出動到趙醫生，個電話，真係好鬼鐘意趙醫生，唔使一定去睇佢，電話CONSALT都得！就係咁，同醫生傾完後，我又要去德福幫卓希買藥，都係趙醫生的醫好好多！

講起嚟，又真係奇怪，卓希依次的肚痾，全都係一起身，早上的，十二點前就一定痾清咗，然後就無痾！

不過成日係屋企，佢又真係幾悶，我同佢早又溫書，下午溫書之餘，做少少課外練習，希望佢做熟多少少，我下個學期唔使跟得咁辛苦！

今早一起身無幾耐，卓希就已經又瀉咗，大大話話都五六次。本來逢星期五我返十點時，都會帶妹妹去搭校巴，唉！個仔係咁霸住個洗手間，攪到我趕唔切，要姐姐出手帶妹妹！佢咁瀉法，係屋企，悶到佢C！

下午我去咗東區醫院到做MRI，SCAN個鼻竇，睇吓出咗乜嘢問題，個感覺唔好，回想返上次係九龍法國醫生照個心時的情境一樣，唔鐘意！希望個報告快D出，我可以正正式式排做手術！

返到屋企， 都用咗成兩個幾小時同卓希跟功課，真攞命，明天仲要溫書！

不知是否學校的飯餸太肥，希這兩天都肚痾，老公今天測驗週開始，只返半天，下午帶了卓希去看醫生，要戒口幾天。但晚上阿仔痾的屁..................臭到我都頂唔順！佢衰豬係咁話，明天使唔使返學呀？仲問埋醫生添，點知醫生話，明天會開始無乜事的啦！佢想偷懶呀！希望快些康復！

創世電視，《愛地球觀察站》之“衝出黑暗”訪問已出咗啦，謝榮順及文俊的幫忙！

今天下午同德國差會老細們開會時飲了兩杯蒸餾齋啡，今晚頭腦好精神，但軀體超赲，未有睡意！

開會，令到我對事情有多些清晰的看法，也讓我內心的感覺越來越強烈，和老公分享了，得到他很大的支持！

自從我學會用BLOG後，都未試過好像現在一樣，日日都沒有UPDATE！無他的，卓希升上小一，一放工回家，便跟功課，跟默書，跟測驗，然後便是預備兩個小朋友帶返學的茶點。到他們兩個真的睇了後，都已晚上九時半，我在網上走遊列國，十時或十時半便會上床，人老了，體力不足，就只好放棄寫BLOG，把一切深深的藏在心裏。

工作還是一樣，學生還是那樣難攪，尤其是外讀生，名乎其實的“無王管”，被我話一兩句便發脾氣，發囉，我覺得他們到了一個是非黑白不分的地步，他日一定會受到教訓！同事呢？這正是我近來煩惱的問題，我發現了有同事在工作時數上對機構不忠，已多番明示又暗示，真的望佢會“回轉”，希望佢會明白，大家都係基督徒，要有好的見證，為何要咁做呢？這個有關“正義”的問題，令我想起了“包青天”，以前剛從瑞典回來時，剛開始無記和亞記的包青天大戰，得益的咪我，因為問題困擾著我，我便上PPS到找包青天劇集看。原來2010又出咗一套新的包青天，係咁追追追，追完後，又有新問題，現代社會，還有沒有這樣“正義”的人？唉！只怪我係一個工作狂，事事都太上心，今年我已學會放開些，但，良心又在叫我啦！

另外呢，卓希上咗小一後，星期一至五真的與世隔絕，要跟功課，默書測驗接種而來，真係替他辛苦。但如果唔同佢溫，我又好有自責，無盡媽媽的責任教好佢，所以今日星期六，佢都係屋企做做做，溫溫溫。我好唔想，週未其實係要外出去玩，為何變成咁呢？咪就係香港的K型教育制度！卓希剛派了是次測驗成績，中文83分，數學77分，英文89.5分。真的不過不失，但也令到我不得不去書室買練習要佢做！POOR CHILD！

今日同卓希溫書，佢都好忟，但在小休時，佢突然寫張紙條給我們，佢真係好可愛呀！

晚上頂唔順，一定人去咗淘大食飯，溫書溫得多，要去見見世面！晚上係咁影練習給卓希，因為我明天要返工，同唔到佢溫書，只要用練習操佢啦！

今早起床，右眼劇痛，已換好哂衫，執好哂袋，預備送完妹妹返學後，自己就要返十點。但真的痛到連眼都睜不開，只好乖乖的去睇醫生，原來左眼有一粒(我一星期前已知，但唔痛，不過就載唔到CON，因為令到個CON係眼球到係咁郁)，右眼有兩粒，滴眼藥水時(濾固醇)痛到我係床到殿呀！

我成個人個底太熱啦，連眼都生眼瘡，以前從未試過，年紀大咗後，乜都有得我試！

由屋企氣窗影出去，就可以見到少許煙花，希望啟德起好公屋企後，都仲可以睇到！

今晚我返到屋企，跟功課時，就見到卓希張默書，嘩！老師工作效率好高，即日默，就即日改同派，如我所料，個衰豬一定係九字頭，又係錯粗心大意，由得佢，等老師教佢啦！

明天卓希要經歷人生第一個學校默書，溫咗三個幾星期，終於有成果。佢好緊張，今日問咗我三四次：明天是否中默？睇佢外表無乜嘢，其實內心真係好緊張！

我知道，也許是由於我幾每樣溫書拆開咗幾個星期咁溫，令到阿仔有種無形的壓力，咁樣，總好過只用一個週未同佢溫，否則我會癲的！

今晚臨訓前祈禱，我同卓希話，如果明天還是很緊張，就可以自己安靜祈禱，求天父賜予平安！

今日另一樣經歷神的恩典是，車的雨檔終於挨唔住，係我地返緊教會路上的三號幹線路上斷咗，好彩後面無車！

如果後面有車的話，會打到佢的檔風玻璃窗，要陪的！感謝天父！

卓希係學校的興趣班，選擇咗畫班及足球，星期四係第一次上足球班，回家後，他問可否買一對在草地上用的足球鞋。因為學校會到石埉尾的草地足球場訓練，咁又係的，在草地上跑又應該用有釘的鞋，所以我哋去咗MEGABOX到買。佢楝咗好鬼耐，佳因有魔術貼的釘鞋無佢SIZE，只有綁帶的，但問題在於他不會綁帶，無法啦，都係要一雙綁帶的，依幾日要加緊訓練綁架呀！

MORMOR MORFAR為咗要見兩個孫，就到MEGABOX JOIN我哋，一齊去食KOREAN BBQ，幾好味，但食完後好口渴，我返到屋企仲係咁“痾”，即是D嘢肥膩啦！唉！痾到我無哂力水咁上床！

一早起身，有個小朋友一聽到歌，牙都未刷，臉又未洗，尿都未痾，就係咁敬拜，笑到我肚痛！一敬拜完心愛的詩歌，就再懶過床，服！

淘寶精今次淘到：鈦鈴、水潑、雨擋、沙板等！誇張！預備幫我的座架嚟一個小番身，用咗架車大大話話都十年，十年來除咗幫架車打立外，真係無理過佢的外表，都係時候整少少嘢，雨檔又壞咗，車鈦又開始光頭，機油又要換。唔整的話，我成日係公路到飛奔，怕有一日係公路到“死火”我就真係死火了！

今日要返耳、鼻、喉科覆診，醫生都未答到我幾時做手術，不過佢話我個鼻成日有綠色鼻水，要照照個鼻竇，如果有問題的話，就做手術時一次過做哂，無就最好啦！

唉！所以，我又去咗排期做鼻竇的MRI，無錯，係MRI，貴到無人有的MRI！唐醫生好好，佢幫我申請做快期，所以今日排咗10月28日就可以做MRI，也許，十一月就可以做埋個鼻手術，希望到時一天都光哂啦！

由細至大，我都知自己個鼻麻煩，但如果唔係今次醫院跟得咁貼的話，我真係唔知個鼻的麻煩情度係真的超麻煩，只好一等再等啦！

下午，返緊屋企時，收到卓希班主任的電話，衰豬係學校又衰咗鑊嘢，雖然學校今次輕判，但卓希的態度真的很差，CHOK咗佢好耐，佢都唔講，直至我話：老師打咗給我，佢先扮記得咁話少少過我知！到佢爸爸問佢時，佢又係無失記憶，唉！我真係好怕阿仔第時做壞人，如果再係咁落去，佢真係會行歪路，我哋兩個真的要教好佢！

無哂心機！

簡直無哂心機，點解香港的教育制度係咁迫學生？

小一生啫，生字都未識，就要日日做乜乜乜練習，都未識解題，又未識認字，咁咪又係家長做！做乜鬼係要谷小學生，快快樂樂咁學習咪好囉，攪咁多嘢，小三又要統測，小六又要統測，學校咪就為咗依D統測做好多準備功夫。日日家長放工後就係同小朋友對著功課，邊到有其他溝通時間？唉！灰！

我哋今晚返到屋企後，跟咗阿仔的功課成個鐘，佢乜都未做！然後，仲要同佢重溫默書，仲要溫明天上課的PHONICS呢？連下星期要默的金句都未重溫，英默溫都未開始溫過，一返到屋企就係功課功課又功課！(所以我給學生最多的功課係週未，多D時間做麻)簡直對香港教育制度火滾，點解家長話要多D功課，學校就一定要加多D功課，乜學校無自己立場的嗎？永遠要做被家長牽著鼻子而走的牛嗎？

我呢？唔係嗰D要老師俾好多功課的家長，我寧願同小朋友睇多些課外書，去玩玩，伸展多些大肌，好過咁樣做功課法！香港教育制度，害死人的制度！

近來同阿仔溫書溫多咗，發現佢有時將d同b攪亂咗，昨日開始溫個九個詞語，佢又將“味道”的“味”字，同“舌頭”的“舌”字攪亂，成日都寫成“舌道”“味頭”。

今晚又再溫一溫時，又係依兩個詞語瀘事，我諗每日一默都係咁上下，阿仔太粗心大意了，我又猜，到底佢有無讀寫問題呢？一定唔迫得！

今晚比平常早咗半小時返到屋企，阿仔今日得兩樣功課，跟咗佢的功課後，我仲有時間整明天佢哋的茶點：橙味朱古力海綿蛋糕

卓希只係做咗小學生十多天，我已忙到無命！時間上真的不夠，到我和老公放工後返到屋企，都已經七時半，每日只有一小時跟阿仔的功課(仲要有時間沖浪呢！)，趕佢八時半刷牙上床，九時至九時十五分佢一定會訓咗。試過唔夠訓，早上就扭忟，起咗身，行到走廊都坐咗係地到→訓番！所以我好緊張阿仔準時訓，唔想佢唔夠精神。

記起阿仔第一日返學，意思係DAY 1，我一D都無諗到第一日返學就有四五樣功課，係電話內，阿仔仲話得兩樣，點知，返到屋企，得我一個會打開本手冊，一睇，嘩，成四五樣。最嬲係連老公都信哂個仔得兩樣功課，手冊都無打開過，個晚，對著楊家兩個男人，我癲咗！係癲到老公怕我會傷害個仔，跟本我自己都未能適應到，咁大個人自己又係教師，手冊又唔跟，阿仔完全係做功課唔專心！

只係教阿仔睇每日有幾多樣功課依個習慣，教到我嘔哂血，也是因為這個問題，他給我狠狠的打了！話說9/9(星期五)，那天放工後，我坐在巴士上，想了解他有幾多樣功課，便打電話返屋企，當時他還很認真地答我：「嗯，等我睇吓先，兩樣！」我的心一聽到兩樣，當然係高興啦，可以去HAPPY FRIDAY，但回想自己也是教師，有一個週未的話，點會唔俾功課。一返到屋企，一睇，手冊都無打開到，一數，有六樣！我打個仔，唔係因為佢唔識(佢唔識係應該的)，而係佢睇都唔睇，就講大話！自此以後，我係電話到一問佢，佢就會睇手冊先答我！

又試過係IP CAM到叫工人姐姐放好，我用IPHONE影咗張相後，用電話同阿仔處理功課，因為佢逢星期三仲要學PHONICS，要做一個萬能媽媽真不易，所以離去的心更堅決，求天父指引我！

另一樣嘢，就係要話吓個教育制度，卓希九月二十六日已經要中文默書，仲要背一大段，然後默詞語！星期一默中文，星期五背默聖經金句。根本，每日我放工返到屋企，就只係跟到功課，所以默書的溫習都只係週未做，卓希的舊同學做到預習，但如果俾我要同佢做埋預習，即是週未都要係屋企困獸鬥，無哂玩的時間。依家做小一真係唔容易，睇阿仔書的課文，其實應該係我細時小三的課文，記得小一時我都只係學“快快樂樂上學去”，邊有咁多嘢要學，又要做補充練習。全都係依個教育制度玩C人，小三又要測，小六又要測，咁小朋友咪要由小一已經要操囉！見到阿仔咁，真係發覺依家做小一真係唔易做，點解會咁架？如果我係佢，我會好怕返學！禮賢都已經係一間唔算谷的學校，都忙到咁，如果去到第二間，我諗阿仔晚晚都唔使訓！

所以，即使佢依家連續個個星期都有不同的默書，我全都拆開同佢溫，唔想俾壓力佢，只想佢做一個誠實人！

拆開溫咗三個星期，終於100分！
第一個星期週未背哂佢，第二個星期週未默前三行，第三個星期(即今個星期)就背默哂成課書，第四個星期週未(下星期)就要默第四課的詞語！

今日下午我同老公講，唔得啦，我一定要去走走，唔可以再困係屋企，所以一家人去咗西貢到TEA，係車到，我都要同卓希串串英文字，將佢要默的英文解完又解，串完又串，無法，時間又唔多，但又唔可以成日困係間屋企，只好一路走，一路教！希望阿仔習慣後，能輕輕鬆鬆地學習吧！

今日的時間，全都俾哂對仔女，無法啦，星期一至五全都俾哂心光，返到屋企佢哋八時半就上床訓，星期六及日係要盡自己本份啦！

卓希仲同豆B一齊學緊游水(九龍公園)，所以一早出咗去，不過今日我哋三個唔游啦！去咗中港城到坐，傾吓電話，睇吓街！跟住就去咗海港城同豆B一家食飯，天父的安排真係好奇妙，我哋兩家不經不覺都識咗六年，仲係六年友誼未變(兩個小孩)，真係好開心！

去到海港城，嘩！我都係咁大個女第一次咁近距離見到咁大架戰艦！

下午返到屋企，我同妹妹兩個倒頭就訓咗，我真係好攰呀！跟著又係整餅餅的時候，好開心，兩個小朋友一見到，就知係邊個位要幫手啦！YEAH！

Double chocolate cookies and Almond chocolate cookies!
同一個底(一雞兩味)，可以加兩種唔同的味道！

今次整依個係好容易，但係就整好後，要放入冰格到最少兩小時先可以拎去焗，妹妹成日問：D餅餅得未呀？真係煩到嘔哂電！