港楊回憶，樂趣無窮！

其實上次甩第三隻時，依隻都已經鬆鬆地，佢唔俾人點，今日下午食飯時，係咁流血，我話叫佢食完飯去嫲嫲到請嫲嫲幫佢大力拉出嚟。點知，嫲嫲話過嚟幫佢，然後就唔使出力拉，就甩咗啦，隻衰豬希話：今次都唔痛的！

卓希話隻牙鬆咗好耐，其實去韓國前都已經可以用手整甩佢，但係佢話痛，點知今日去嫲嫲到，我打過去請嫲嫲幫佢拉出嚟，就係咁，甩咗啦！

前幾日我剪頭髮預備返工時，想＂的＂埋阿仔去剪，佢唔肯，話：要用d頭髮嚟增加考試記憶（大笑，佢自己都話講笑咋）點都要考完試後先肯剪。今日最後一日考試，一落校巴就去剪頭髮，睇，靚仔哂！（我又開始為仔發狂，佢真係好可愛）

昨晚見到阿仔大被咁訓, 知道佢一定有唔妥, 一模, 發燒ing, 今日就無返學啦, 燒到成個人都紅紅的, 一定又喺係學校get到的!

卓希明天便七歲了，和他傾好，今年不攪生日會(我會無命)，但自家人會和他開開心心地切蛋糕！

他的生日禮物，戰機

mormor、morfar、爺爺同嫲嫲都有嚟自家生日會！

卓希同我近來鼻水超多，個個都話天灸好有用，就俾佢試吓，希望有用啦！

話說星期三晚卓希出”風爛”，我都未返到屋企，老師已經帶佢去樓下到睇醫生，當時醫生發現原來卓希下面兩隻牙出咗新牙，但前面兩隻郁都唔郁！

為咗免得前面兩隻阻礙到後面兩隻的發展，只好去牙醫到脫咗佢，成惠$560兩隻！

之前買定的乳齒盒依家有用啦！今晚要先浸漂白水(1:1)，明天乾咗後，可以放入盒啦！YEAH！

卓希不知幾開心，因為佢身邊好多舊同學都已換了牙，只有他無動靜，今次可好了，他成天都好開心咁笑，臨訓前仲話：我真係大個仔啦！(太好笑了)

卓希昨天已經只係痾水，為咗安全起見，今日都要佢留係屋企，以免個肚有動靜。工人姐姐話卓希今日識得話要去開大，跟著自己係洗手間到攪得點，唔會好似之前幾日咁賴到成條褲都係，即是佢已經踏入開始好的階段！

依個仔有時都幾底錫，係屋企我都影咗練習佢做，免得無所事事。咁，佢又出奇地好乖，係屋企喺咁做，教我如何不愛他呢！

但願我能係屋企好好咁照顧佢！    

有人做媽媽的練習，成日出現咁的字眼：「我不知道」！笑咗出嚟！

跟著，又會見到個「楊」字時，又寫道：「楊卓希的楊」，笑爆咀！

今早，我都未醒哂，已經聽到老公話卓希又痾過，佢大大話話都痾咗成三至四次(已經少過昨天早上)，又係水PAT PAT咁！

終於都要出動到趙醫生，個電話，真係好鬼鐘意趙醫生，唔使一定去睇佢，電話CONSALT都得！就係咁，同醫生傾完後，我又要去德福幫卓希買藥，都係趙醫生的醫好好多！

講起嚟，又真係奇怪，卓希依次的肚痾，全都係一起身，早上的，十二點前就一定痾清咗，然後就無痾！

不過成日係屋企，佢又真係幾悶，我同佢早又溫書，下午溫書之餘，做少少課外練習，希望佢做熟多少少，我下個學期唔使跟得咁辛苦！

今早一起身無幾耐，卓希就已經又瀉咗，大大話話都五六次。本來逢星期五我返十點時，都會帶妹妹去搭校巴，唉！個仔係咁霸住個洗手間，攪到我趕唔切，要姐姐出手帶妹妹！佢咁瀉法，係屋企，悶到佢C！

下午我去咗東區醫院到做MRI，SCAN個鼻竇，睇吓出咗乜嘢問題，個感覺唔好，回想返上次係九龍法國醫生照個心時的情境一樣，唔鐘意！希望個報告快D出，我可以正正式式排做手術！

返到屋企， 都用咗成兩個幾小時同卓希跟功課，真攞命，明天仲要溫書！

不知是否學校的飯餸太肥，希這兩天都肚痾，老公今天測驗週開始，只返半天，下午帶了卓希去看醫生，要戒口幾天。但晚上阿仔痾的屁..................臭到我都頂唔順！佢衰豬係咁話，明天使唔使返學呀？仲問埋醫生添，點知醫生話，明天會開始無乜事的啦！佢想偷懶呀！希望快些康復！

明天卓希要經歷人生第一個學校默書，溫咗三個幾星期，終於有成果。佢好緊張，今日問咗我三四次：明天是否中默？睇佢外表無乜嘢，其實內心真係好緊張！

我知道，也許是由於我幾每樣溫書拆開咗幾個星期咁溫，令到阿仔有種無形的壓力，咁樣，總好過只用一個週未同佢溫，否則我會癲的！

今晚臨訓前祈禱，我同卓希話，如果明天還是很緊張，就可以自己安靜祈禱，求天父賜予平安！

今日另一樣經歷神的恩典是，車的雨檔終於挨唔住，係我地返緊教會路上的三號幹線路上斷咗，好彩後面無車！

如果後面有車的話，會打到佢的檔風玻璃窗，要陪的！感謝天父！

簡直無哂心機，點解香港的教育制度係咁迫學生？

小一生啫，生字都未識，就要日日做乜乜乜練習，都未識解題，又未識認字，咁咪又係家長做！做乜鬼係要谷小學生，快快樂樂咁學習咪好囉，攪咁多嘢，小三又要統測，小六又要統測，學校咪就為咗依D統測做好多準備功夫。日日家長放工後就係同小朋友對著功課，邊到有其他溝通時間？唉！灰！

我哋今晚返到屋企後，跟咗阿仔的功課成個鐘，佢乜都未做！然後，仲要同佢重溫默書，仲要溫明天上課的PHONICS呢？連下星期要默的金句都未重溫，英默溫都未開始溫過，一返到屋企就係功課功課又功課！(所以我給學生最多的功課係週未，多D時間做麻)簡直對香港教育制度火滾，點解家長話要多D功課，學校就一定要加多D功課，乜學校無自己立場的嗎？永遠要做被家長牽著鼻子而走的牛嗎？

我呢？唔係嗰D要老師俾好多功課的家長，我寧願同小朋友睇多些課外書，去玩玩，伸展多些大肌，好過咁樣做功課法！香港教育制度，害死人的制度！

昨天和卓希參加了同學仔的生日會，傾開話影畢業相，就約好今日係又一城行去城大到影，真係好攪笑，超多人望住，但係小朋友們又算好合作，真係好開心有一班咁會拍的家長們！

今日終於都幫到卓希報咗暑期班，第三年啦！感謝天父次次都可以係童軍知友到報到班，因為之前聽朋友說很難報的，但我哋次次都報到，唔係天父的幫助，我真係唔知仲有乜嘢其他的解釋。

我年年都幫佢報一D玩的班，真係唔想佢太大壓力，仲有二十幾年書要讀，太大壓力及期望俾佢，我怕會好似D大學生咁睇唔開！真係好希望佢係開心的環境中學習。

今年報咗：

1/ 專注力強化訓練

2/ 兒童詠春學堂(依個底，350元十堂，平過出面好多)

3/ 兒童天才畫班

4/ 朱古力掌門人

今日放工時，MORMOR MORFAR打電話給我，話想嚟我哋到見兩個小朋友，我一定明白佢哋的心意，昨天去唔到個生日會，想今晚見個孫！

好彩，昨日剩咗好多食物，今晚全番熱，七個人全飽飽！老公同我仲去買咗美心的MINI蛋糕，又係切蛋糕的時候！

就係依個時候，我的舊同學JOHNNY打給我，原本佢昨天都去生日會(佢住大埔)，佢話經過我屋企，想俾份生日禮物給卓希，點知唔係一份，係三架搖控車！我一直都有教卓希唔可以貪心，只可以給他選一架，其餘兩架我就給其他小朋友！因為連大伯所給的在內，兩部搖控車，只是大伯個部未有义電給火牛，我吔唔識配，要大伯先知邊隻啱！所以卓希由上星期六到今天都成日好想開大伯個部搖控車，今晚終於可以一試！不過我落咗ORDER，唔准係屋裏面玩，否則我個地板會無啦！

所以佢真係好開心，個個都鐘意佢，我同佢講，只要佢聽話，唔好做我唔准的嘢，咁就好多人都會喜歡佢，依樣佢好受！

六年前的今天，我和卓希當時在東區醫院，本來可以在十九號出世的卓希，就係因為媽媽唔夠氣，哮喘病又發，要勞動醫生嚟吸佢出嚟，才拖到二十號凌晨二十一分才出到世。

 依個仔帶俾我哋好好好好多開心，又令到我多咗三條白頭髮，本來靚靚的我變成好多嘢諗！但係如果唔係卓希的出現，我唔會體會到一個媽媽的辛勞！

今日我哋終於可以去大埔海濱公園，天父真係有好好的安排，無落雨，無大風，無好曬，每個小朋友都玩得好開心(我認為)！

老公由一開始知道我同卓希一齊想攪個草皮生日會時，已經係咁話會落雨，佢把烏鴉口，真係俾佢講中！

上星期日，老公仲係度咁講，卓希係佢的IPHONE的天文台APPS到睇天氣，仲指俾佢爸爸睇有半個太陽，無雨落！點知，去到星期三，突然出咗兩滴雨水的天氣報告，我同卓希都好唔開心，因為我哋已經PLAN好哂所有集體遊戲(卓希自己諗的)，訂好哂嘢食，差不多所有嘢都攪好，就話會落雨！依個星期我哋的禱告都係求天父俾我哋好的天氣，真係信心的功課，我用摩西過紅海的例子同卓希分享(係咪誇張咗呢？但係我當時諗唔到其他的例子啦！)，話即是咁大個海係我哋前面，天父都會有佢奇妙的預備！

今天下午同卓希一起CHECK IPHONE的天文台的APPS，發現由原來的有兩滴雨變咗做寒冷天氣，我哋都禱告，貪心少少，希望生日會時係草皮會有陽光！

卓希緊張到訓唔著，因為終於論到佢攪生日會，老公終於好似明明哋點解我年年都咁堅持為個仔開生日會，一年一次做主角，都唔覺過份，第時大咗，佢都唔會要我哋幫啦！

今次第一次自己全部預備，真係好多嘢做：

1/ 禮物仔回禮，男同女要分開，仲有就係朋友仔的細路妹又會唔同，依樣先用咗架車好多的空間

2/ 摺椅、摺桌、野餐墊，生日會食具

3/ 訂食物，依樣係我最頭痛的，因為都唔知會唔會訂得太多，希望明天佢哋同我食哂佢！(不過我已預備好膠盒，食唔哂就拎返屋企)

4/ 訂蛋糕，只係三磅，因為有其他食物，我堅持唔使咁大個蛋糕

5/ 飲品，特登買咗麥精及維他奶，係屋企整熱佢，然後拎去可以暖暖哋咁飲，好似七十一的熱維奶咁！

午飯時和卓希傾電話，我問佢凍唔凍，佢話唔凍，我話心光好凍，跟住佢話：「你咁凍，做乜你唔返嚟呀(屋企)？」 so cute！阿仔，如果你係我老細就好啦，咁我就可以返屋企！

今天返完教會後，急急腳去卓希同學的聖誕聯歡會。我被委派做負責遊戲，點知其他時候都要幫手，都好，見到班小朋友咁開心，我個心酸得一陣陣，因為有好多朋友仔要離開禮賢，去另一間學校到讀書。我自己就好唔捨得，因為依班媽媽同我建立咗好好的默契，而且係佢哋面前到教仔一D都唔覺係一回事，因為個個都已經睇慣慣熟。

晚上老公去咗飲，我同卓希早早就上床傾計(因為妹妹乜嘢都扭計，我哋唔啋佢！)我告知好多同學都會離開禮賢時，卓希唔開心，要求我日後都要同依班同學仔一齊開聖誕聯歡會，我話要同其他媽媽夾吓先！

自己先幾日先搵返失散咗的小學同學，阿仔的心情我係好明白，唉，佢大個仔啦，分離的STAGE一定要經歷，但會唔會太快咗少少呢？