港楊回憶，樂趣無窮！

今日又係我一個人全線照顧兩個小朋友，其實SET好RULES的時候，一D都唔難，難就難在卓希要返興趣班，1:30-2:30朱古力班，3:30-4:30畫班，中間隔咗一個空間。本來係幫佢報A畫班，咁就係接住落2:30-3:30，可以連圍裙都唔使除，但係到我報的時候，居然A班無哂位，要報B班，咁即是要有一小時的自由時間。本來，帶咗卓希去朱古力班後，我係打算唔返屋企，同婷婷係童軍中心等卓希的，點知收到一個媽媽朋友的電話，要返屋企幫佢上網整少少嘢，所以留底咗卓希後，就急急腳返屋企。咁啱，婷婷又扭計，要同哥哥一齊玩，只好“的”佢上車仔，然後衝返屋企。

好，到2:30接卓希後，我哋就去咗大排檔到TEA，點知超多蚊，我哋三個都被咬，然後去日本城到睇玩具。帶卓希返童軍中心後，原本係無諗住返屋企，點知，依個時候嫲嫲打嚟，話佢哋的工人姐姐要拎湯過嚟，又係急急腳咁走返屋企。可想言之我的運動量大到不得了，到最後一節接到卓希後，又要急急腳返屋企，預備佢哋三個的晚飯，因為我晚上有約會。

好開心的飯局，咪又係約咗卓希同學仔的媽媽們，今次我哋傾生仔時的經驗，笑到肚爆。我未試過食日本菜任食的，第一次，真係超好味！松屋，我一定會回來！

返到屋企，都未夠十點，但係就好激氣，碗未洗、玩具係地上無執、小朋友刷牙後的牙刷毛巾還在洗手盤內。平時小朋友們係會自動自覺執玩具，刷完牙後會放返好哂所有嘢，但係今晚屋企真係七國咁亂，一返到屋企就係做家務，真係成肚氣！