港楊回憶，樂趣無窮！

好多天都無寫BLOG，一嚟返到屋企真係攰，二嚟，我掛位玩新玩兒，所以咪無時間囉！哈哈哈！放假真好！

我昨晚上床時，鼻水倒流得很利害，令到我係咁咳，最後一次望時間都成半夜一點，今早又起身要去卓希學校到家長會。一起身後個喉嚨好痛，但係無時間去睇醫生，因為要出去，下午興趣班回家後，醫生都收哂檔，明天星期天又無得睇。如果，真係惡化落去，我真係要睇睇，都吽咗成個星期啦！

講起卓希選小學，我真的聽到越聽越唔明，覺得個系統好復雜，要慢慢再睇睇先！不過，除咗禮賢之後，我都未諗到邊間小學給他，真係又開始煩我啦！

我係咁搵依個“穿髮棒”的用法，希望可以幫妹妹整靚少少個頭！

繼無咗把聲之後，就開始係咁咳，依兩日係屋企，無必要的嘢，都唔講，今日把聲返番嚟，但係都係咳到我無命！

繼我把聲失咗後，又未完全好番時，輪到婷婷妹妹開始病。昨晚半夜一點半，攪到我五點先訓，跟著七點半又起身。成晚佢都訓得唔好，又話好眼訓，又話個鼻唔舒服，最底死就係成晚訓訓吓係咁喊！今早本來一早去禮賢的開放日，一嚟我唔願起身，二嚟天氣唔好，三嚟真係好攰，成個人都散哂！所以都係中途先去開放日，卓希好開心，因為平時係唔准去咁高的層數到睇課室的！

今早返完教會之後，先先返咗屋企，休息一吓，然後就要出發去天恩堂，因為今日係信義會芬蘭差會靈愛中心四十週年感恩崇拜！

講起靈愛中心，我細細個就成日走上去，因為當時爸爸仲係個到做職員，有時為咗要湊我同細路，都會一併帶埋去，一開門，就會見到班弟兄四散咁走入房，因為全部只係著底橫，有女仔咁快快咁入房著番條褲，依家諗起都覺好笑，但係當時真的不知是怎樣的一回事！

講番靈愛中心，MORMOR一嚟香港，係芬蘭差會的工作就係做福音戒毒，一做就做到退休，由退休就做到依家，尤其是家庭問題，所以有時我都會覺佢真係好有天父的力量及愛心，我？好想逃避，唔係好鐘意係一所基督教機構見到擦鞋的動作，但無奈地就係有咁的人，無奈！

所以，今日係到諗，心光學校的同學仔真係要放眼多D外面的世界，也許會安排佢哋入一次戒毒村到參觀及領聚會，讓他們學習如何去關心有需要的人！

返完教會之後，我地就去咗機場，因為我心愛的細姑姐同表弟返加拿大，做乜鬼個個都鐘意去外國，整到成家人都分開哂！

好唔捨得，細姑姐係繼MORFAR同MORMOR之後，我最最親的人，細的時候仲成日走去佢的房到孖鋪，又等佢返咗工之後，係咁玩佢的護膚品，連認識ESPRIT都係佢教的，真係超超唔捨得！仲有我依個表弟，雖然鐘意癡家同打機，但係真的好純，返到香港居然鐘意癡住我哋一家四口，今年仲有膽量抱妹妹添，真的好開心佢哋返嚟！希望第時多D返嚟啦，自從我的嫲嫲同爺爺走咗後，都好好好少家庭聚會。以前我會好熱心去安排，但係依家有咗兩個小朋友之後，真的無時間，個腦容量有限，唔可以一心幾用，所以都係接到ORDER後就會出現，但要親身攪呢就麻麻地！

咁，明天年見！

今日正式返工，真的帶著戰戰兢兢的心情，因為我知得我一個人在三樓，我又唔係驚，只係每每見到空空走廊時，內心很酸！真的求天父治癒我內心的傷痕！

一返工，當然好多東西要做，直頭好似阿四咁係咁做，但沒有了一些傾得開的好同事，感覺怪怪的，時時都好似會在三樓再見到他們，但他們已有新的工作與岡位，希望他們適應吧！

楂車返屋企前，先到油站加油，因為油釭的顯示燈閃著，好少楂車楂到閃燈的。而且早上和同事傾談時，她告知有另一位同事因為車無油，在東廊“死火”，嚇到我心內不停禱告，連冷氣都關掉，為的是可以慳多少少油。終於都加了油，回到家樓下的停車場時，點知落車後，唔見咗個銀包，在車找了兩遍，後來在車門的一個不起眼的位置找到，我都話自己一定會有大頭蝦情況出現！

晚上在看直播，居然內心平靜了很多，因為我知所有“團友”已“回家”了，最起碼，在香港會有正直的醫護人員，有良心的法醫去寫這些報告！

卓希的暑期班開始咗啦！雖然今個星期佢同妹妹真係好忙，但係佢哋忙好過我忙！明天開始就要返教會參加暑期聖經班，起碼有兩個半小時可以給我處理屋企的嘢！

妹妹昨日下午突然開始發燒，唔知係咪佢流鼻水個到令到佢發燒呢？本來今日都已經退咗，但係到黃昏時，佢又有微燒，真係煩！所以，其實我要開始諗吓去旅行的事情，但係真的未有心情住，只係BOOK咗貨VAN一早嚟接我哋，同埋星期五要CONFIRM台灣個邊的包車！我好希望出去玩吓，起碼自己可以散散心！

終於都去咗睇耳鼻喉醫生，真係鼻竇炎，又要同抗生素做幾日朋友。我都話係鼻竇炎的啦，樓下的洪醫生居然話我係感冒，我又無骨痛，又無喉嚨痛，何來的感冒，啍，等我一星期內要睇兩次醫生添！

下午係屋企，有人送嘢嚟。係我玩淘竇以嚟，第一次用集運，真係好平，20.7kg，都係130元人民幣，其中仲係卓希的新單車，佢開心到不得了！

晚上約咗卓希的同學仔的媽媽們去食飯，一個月前已約好，所以個個媽媽都好期待今次的約會，個個都有好多節目，都唔係好就到時間，只有今晚依個日子，咁啱我又唔使返夜，所以係超好，好開心！個個都好啱嘴型！

今日我終於忍唔住啦，有一位同事成功地轉另一間特殊學校，GM位，佢係我識咗八年來好好的朋友，睇住我大肚， 睇住卓希出世，我又睇住佢結婚，知道後見到佢個樣，雙眼的淚水不自覺地流下！

其實我一直都知佢想走，但係由一間特殊學校轉到另一間特殊學校又有乜意思呢？就係因為個GM位，如果心光有新高中就好啦，可以有多D GM位留到一班好的同事！今日佢答咗對方的校長時，就SEND咗一個信息給我，個心真的UN住UN住，選擇唔去答任何嘢，係咁做嘢！但係我要去另一個特別室問其他同事嘢時，初時佢都唔係到，但係一見到佢入嚟，真係無鬼用，眼淚水不停咁流。佢都未見過我喊，我一路同自己講唔好喊，但係就眼淚水仲流得快D！我唔想個同事走得唔開心，但係就唔可以阻止到我的唔開心！

唉！之前無幾耐佢先答應我明年幫忙小學的團契仔，依家又走，真係基督徒走得的走啦！

咁！如果我出到去普通學校到，個巿價又會幾多呢？唔准諗住，今年一定唔可以走住，要幫得幾多就幫幾多！

依個教育局，回應得咁鬼鼠，依家唔單只講老師，仲有講復康訓練呀！http://www.edb.gov.hk/index.aspx?nodeID=7974&langno=2

本來唔想寫BLOG，想給自己的“黃金右手肩”休息吓，但係又忍唔住！

今日終於有同事幫我搬咗電腦同個MON係另一邊，不過佢做得較馬虎，唉！由得他吧，其他同事都叫我唔好叫佢做粗重嘢，但係佢真係無乜嘢做，連佢的專長都唔做的話，咁請佢返嚟做乜嘢呢？由得佢做住先，星期一先請佢其他的拍檔執執手尾！

今日係六四，二十一年前發生的事情好似一幕幕咁係睇前，當年係瑞典，自己當年睇電視又唔係明好多，所以好多資訊都係返到嚟先明同知。每次睇到電視的一幕幕，心裏都有一種怕的感覺。尤其是今年泰國都發生同樣的事情，民主怎樣可以在亞洲進駐呢？亞洲人太過獨裁啦！

我今晚終於試咗個地毯及那些咭紙啦！卓希好開心咁跳，都好多都跳得啱！好嘢！

近來工作上發生咗幾件事，令我不禁真正咁諗諗，何謂“港女”？

其實，香港人用“港女”一詞係好差，以下係搜集的資料！

以下特徵乃收集了網民的意見，表現不同網民對港女特徵之理解，因此未必是對「港女」的所謂「正解」或「官方解釋」：

港女影相指南

• 社交態度差，例如奉旨遲到，在公眾場所爆粗、喧嘩、說別人是非（不管是否認識的等。
• 對男性缺乏基本的尊重，如果看見一個港女和她的男友逛街，男的一定會是一袋二袋的。
• 以為男人天生就要遷就和順從女人，例如要替女人付賬。
• 認為香港男士喜歡（砌模型、看動漫、打機）是幼稚和不務正業行為。相反，自己喜歡Hello Kitty就是充滿童真。
• 既要男女平等，又要男士有風度，總之要對她們有利。
• 愛搬弄是非，只愛娛樂新聞、八卦雜誌、「做隻貓做隻狗」的情歌、無綫的港女劇集與節目。
• 看電視和球賽只為了看俊男，如新城電台女主持車車更在《新聞透視》中批評林尚義落伍。
• 影相招牌甫士：視像鏡頭（web cam）有幾矇就弄得幾矇、「三七臉」、反V手勢、嘟嘴。
• 打字招牌模式：
  • 火星文、閃字、表情符號交叉使用，最愛不倫不類的中文，如「禾刀唔豬梨趕ｄ mｕｄ o羅」、「巧令令」等。
  • 港女打字範例請參看偽基百科的「港女文」一文。
• 有意識地發姣，招攬觀音兵和狗公。狗公的作用：滿足港女的虛榮心和成就感、狗公為主人為奴為婢、狗公為主護航，咬死所有批評者。
• 對別人（包括女人、已婚者等）批評港女的看法：你班毒男溝唔到女就係度中傷人，抵你地一世溝唔到女！
• 異常
• 到國外旅行時，多以購物（shopping）為主，次為吃喝玩樂，對觀賞名勝及感受別國文化全無興趣。其中，西歐及日本乃港女必去之名牌勝地。
• 最愛於網上討論區自貼。
• 說追隨漂亮女士的男子叫「電車男」，自己卻以男士外貌論人。
• 地重視別人對自己樣貌的看法
•  

點知，係工作環境上真的會見到此等“港女”，真的為之大開眼界！

好幾個月之前已經知道自己要去上堂，不過近來真的很忙，所以有少許唔想去。但之前和同事傾過，去過的同事都有不同的分享，所以我期待著今次係去玩，去學習樣用玩的形式來帶出一些成長的信息。不過，今日出嚟的效果就都幾失望，講仲多過玩，只係玩過幾個破冰的遊戲，然後無啦！仲有，整天坐著看那POWERPOINT，令雙眼很攰，尤其是POWERPOINT前那白色燈，令到我睇唔清，後來要求關那排燈，就睇清楚，不過唔知為何佢哋D社工成日又開番，燦到我D眼好想訓！唉！仲有一日！

不過唔知點解，同組的老師分享，佢哋要上哂中一至中三的課程，但係我哋學校只係需要上一級，真係怪怪哋，令到我唔識答佢哋添，仲有，我個組老人家多，佢哋個個都唔願答問題，只係得我哋個三個後生的答多D，有點兒無穩！

今日係教會堂慶，一早預咗會留耐D，但真係太耐！唔係唔鐘意自己的「家」，不過遊戲時間太長，小朋友又唔識玩，佢地好耐，卓希打咗好多個呵欠呀，連妹妹都開始扭計！

所以佢哋小朋友一表演完，我已經立即走人，為免婷婷好扭計，點知棋差一著，咪就係塊餅出事。為咗要自己拎塊餅，又要自己上車，係停車場到扭咗我好耐，我只好唔准佢上車，係到罰企，直止收聲先准佢上車。希希呢？嚇到無聲出！

所以，本來今日下午應該四時半返心光開救救心光大會，但係我攰到無力，妹妹睇電視，我係身邊訓咗，連佢同老公落咗街玩，我都唔知，真係攰到C！

又係一年一度會考的時間，今日老公攞咗d會考卷返屋企，我就幫佢分號碼。其實十多年以來，我都係咁幫佢，不過自從有咗卓希同婷婷後，就無時間幫佢，佢只好自己做。之但係依家我無學返，又唔一定睇電視，更何況近來唔係好想回應fb又或者睇其他網，咁就幫吓佢，等佢可以睇下個marking scheme！

不過無分咗幾年，今年再分，真係唔係好慣，個腦要諗得好清晰先可以放係個組數目的。事關今年個d學號相隔好大，所以都用咗兩小時的時間先可以分得哂。唉！幫得就幫，兩公婆一定要互相幫吓。尤其是我近來情緒麻麻地，好多時都係老公湊住兩個小朋友，等我唔好怕嘈，所以真係好感謝天父給我咁好的老公！

今日終於係晚禱時段分咗家啦！在五、六月，會將逢星期四晚的青年恩福團般去星期二晚禱的時間，希望中學的同學可以好好咁利用依段時間有聚會，免得佢哋成日話去“演唱會”。團契後，得到好多好評，也許依個係我哋的方向。視障同學就最怕改嘢，其實我提過依個方案好多次，佢哋都唔肯，事關外讀生趕唔切返嚟。不過今日所見，如果真係有心返的，都一定會返到，以前星期四晚都未必會返啦！之但係少青團就唔可以轉到住，因為義工問題，d義工未放工呀！所以逢星期四晚我都仲要返工，希望到學期尾檢討時，有好的結果啦！

本來，今日不想寫網誌，因為情緒不穩定，但看到小吉媽的網誌後，都想寫一兩句！

再一次，這個BLOG是我的私人空間，很同意小吉媽的說法，做港太便會喜歡閃自己的老公、兒子、女兒，但如果是為了寫自己的真感覺而被人插，那真的是沒有自由。不過，初初開始寫時，係希望日後卓希長大後(當時沒有妹妹)，如果我不在人間，他可以藉著這個BLOG看到我們的這一家。人，不知道何時何日離開這個暫住的地方，為了可以讓小朋友了解多些有關自己的父母時，何不寫多少少？

我，會忠於自己的感覺、思想與情感，也試過因為自己所寫的激發起一連串的風波，但我不會為了這些而掩飾自己的感受或停止寫BLOG，那便不是我自己！

一係就唔寫，一寫便忠於自己，如果連自己也騙的話，那便是一個假人！

一路都有做開物理治療，近來又多一樣嘢要做，就係我有週肩炎。

去年十月尾開始，就頸連肩都痛，睇骨科時打咗一支勁針，依家要做物理治療。今日物理治療師我係今日個班中向緊康復，但係都要做多幾個月物理治療，先可以軟番條根。仲有一個壞消息，跟開個物理治療師要我由星期五早上轉到星期四早上，哎呀，我有時要出去開會的！無法啦！唔想請咁多假時就要利用自己D空的時間啦！

我的車，大大話話都已經快十年，因為我年年都去CHECK車，保養得好，所以仲可以走得！

但係老公想試吓日日都楂車返工，不過論路程就係我遠，所以佢想出多部車！

我哋有相熟的車房，今日同佢傾開星期四要攞我架車去整時，講到二手車，佢話佢有大把，仲係本車我哋想要的型號，咁係咪真係要買呢？唉！多一架車，我自己的使費又會少好多！

都係等老公自己諗！

今天想了很多，想到自己的工作，孩子們的發展，家庭的需要，感覺到很大的壓力，好需要停一停，想一想！

我時常想，一個人六十歲先退休，但係身體的機器都壞得七七八八，到時又怎樣享受生活呢？

咁，應該係幾多歲退休呢？我想最好係五十歲，起碼身體不是有太多毛病前，可以停下來！香港的生活真的太緊張，努力向上係好，但係就整壞咗身體部機器，咁又點可以享受到生活呢？記得有一個德國牧師同我講，要愛自己的身體，年年身體CHECKING，有病就要休息吓！理論還理論，生活係香港，真係唔可能係咁，無返一兩日工，就已經成抬都係嘢等著你去處理。病得多咗少少，老細又會以有色眼鏡睇你，別人又會絲絲細語，只會看你請了病假的日數，而不去後以前未請過假的功績！

香港的工作再是如此下去，遲早有更多人需要去看精神科醫生！

天氣太濕啦！我哋十幾年前已經有一部抽濕機，但係隨咗間屋大咗，要乾的衫又多咗，部機都係咁有用，所以係老公反對的情況下都要睇睇邊隻好！

我的心水係16L，太大屋企無位放！

hitachi：RD1699L

panasonic：f-yhc12x

kdk：