我今天才真正的開始計劃北海道的行程，個心好興奮，但又好擔心，因為今次去北海道係自遊行，如果plan得唔好的話，卓希爸就會話我的。
但今天當我在想要幾多個喼時，原來連卓希的東西休是很多的，最重要的是他那半包的尿片。我已經唔帶咁多去的，因為卓希一直以來都是用日本的尿片，到那裏買就係最好的，但原來真的用很多地方。
所以我決定一個大喼放兩個大人的東西，一個手提的喼給卓希的東西。
好啦！我要好好的plan行程啦！
目前分類：靚太數生活 (646)
- Jul 30 Sun 2006 12:08
終於計劃北海道的行程啦！
- Jul 29 Sat 2006 12:09
考完試啦！
今天一早便帶卓希返尖沙咀的playgroup，我自己已經成個月無見其他bb同媽媽們，所以心情都有些興奮。bb們今天學了三樣東西：
- 大筆畫：目的是發展寫畫能力
- 運送物件：目的是發展走路平行力
- 呼呼吹：目的是加強口語前技巧
跟著由於落大雨的關係，卓希爸便提議我們坐的士回家(好少何佢自己提議的，我一定話好的)，返到屋企，見卓希又訓咗，自己離返學考試的時間還有一些空擋，便和卓希一起訓，叫卓希爸準時叫我起身，當然又係無啦，攪到我臨去考試時都係好急。
今天考現當代文學，由於學生已放暑假，所以在之前一個星期已經好努力咁溫書，但係睇來睇去都好亂，所以昨天晚上我決定唔溫。今日一打開份卷，嘩！有d又好似似曾相識的，有d都睇都未睇過，以下是我依稀記得的題目！
甲部：詞解(四選三)
- 樣板戲
- 中國左翼作家聯盟
- 聞一多與格律體
- 文學改良芻議(溫書時都未見過這個詞)
咁我梗係選咗第一至三題啦，然後仲有問答：(三選二)
5. 沈從文戶樣揭露人性陰暗面的寫作改白
6. 魯迅小說的「表現的深訓」及「格式的特別」
7.文學作品改編而成的電影，試評論張藝謀(本來想選依題，但係都搵唔返電影個篇文章，所以便放棄)
然後就係我最弱的文章分析：(二選一)
8. 詩一篇
9. 散文一篇(梗係散文啦，容易明麻！)
其實最後一部份我真的沒有時間做，只剩下十分鐘，點都作埋落下，有幾多分就攞幾多分。
當我返到屋企後，卓希爸就俾咗d卓希在家的罪證給我我看，平時是不准卓希爬上床頭柜的，但今天佢居然爬過床頭柜，然後仲走過去電視到，跟著就係佢的目標，無線電話。依兩個大細路，時時當我不在家時就係咁破誡。所以話點解卓希有時唔聽爸爸話，係跡有可尋的。
今晚我們一家去了pizza hut食晚飯，我見有兒童餐，便貪得意的叫了給卓希，其實他五點時已經食了大半碗粥，點知，點知，佢成個兒童餐都食得落。唔知係咪佢今晩好興奮呢，同佢沖完涼後，預備同佢穿衣服的時候，佢居然一口咬住我的手。嘩！當時我真的痛到想大叫同咸，個仔初時以為我仲同佢玩，但係我真的痛到手都無力抱佢，卓希爸便來救我，卓希見形勢不妙，便係咁鍚我。我同佢講，媽媽今次係唔會罵你，不過真的好痛，下次唔好咁啦，如有下次我會不留情地罵的。卓希似懂非懂的望著我，唉！依個仔！
- Jul 28 Fri 2006 12:11
我唔好人？？？
今天下午我同卓希爸去了nikko hotel食自助午餐，好耐都唔食過啦！nikko hotel雖然係貴，但係佢的甜品同燒牛肉就真的好好味。學卓希話正頭飽到上心口，所以我們跟著就去攪旅行保險同買少少禮物給芳ee的孫女。
話說今晚卓希爸又有舊生的飯局(以前又唔見佢有咁多，突然之間一個星期有兩次，嗯！一定有d嘢的！)咁就又係得我同卓希兩個，我由一早就已經係打電話給卓希的契媽，但係打極都搵唔到契媽，手提又係留言，打去屋企又成日都無人聽。本來我想d小朋友一齊玩吓，但係找唔到契媽的話我會想帶卓希出去行吓，因為臨近佢要訓之前通常都會扭計，咁咪諗住同佢出去德福商場到行吓。不過在六點幾時落得很大雨，所以便打消，到七時正時又好好天，咁我就帶著卓希出去德福，因為我自己想去esprit。
一去到後便到esprit找我想要的裙，近來大減價，我想要的那條裙由幾百元減完又減，減到依家$99一條，最重要係有我的碼麻！一去到我便找到我要的東西，咁點都要試吓先得的，我便唯有帶埋卓希去試身室到試裙，佢好開心咁週圍攪，攪燈，椅子啦，仲識得樽底身由門下面望向出面，笑c我。
好啦！咁就要去counter到俾錢，卓希好乖的在我懷抱裏等俾錢。在我前面仲有幾個人係到排隊，在隊的最前有一位上了年紀的亞太係到同d職員係咁理論佢張折扣咭已經過期的事情。在我前面的那位小姐是esprit的員工，我都覺得奇怪點解會突然站在我身後的呢？原來在最前的亞太話要用佢的員工咭來買一件衫，但係counter的sales就話唔可以，那是給員工的。當我正在俾錢時(sales已經係到錄緊我張咭)，突然佢同我講，話要俾現金過我，口叫我幫佢用我有折的信用咭幫她找收。但係我唔肯，一、我抱住個仔，二、我唔想同d唔識的人有錢銀問題，咁好自然的我便拒絕了她。點知跟著佢就一輪嘴的在我耳邊話我，又話如果有其他人要佢幫的話，佢一定會做好人幫人的，幫吓人都唔得。連d counter sales都頂唔住，同佢講話如果其他客人唔願意的話，係唔可以咁樣要人哋做的。但係佢都係不停的咁話，都唔好人，又唔幫人。我真真真係想“丙”佢，不過我忍住，我唔想嚇親卓希，就好快的走了，我們仲走了去ceu到睇狗仔公仔添。唓！如果個仔唔係我身邊，我就一定唔忍佢，佢d說話簡直難聽到不得了，亞太，人哋唔借咪唔借囉，張咭係我的又唔係你的，你使唔使咁話人。你又唔係買十萬九千七的衫，只係為了一件衫的九折。所以我話唔單只時下青年人無禮貌，連d上咗年紀的人也十分之無禮貌，都唔睇吓我係單手抱住個仔，然後另一隻手又在簽名，有咁多人你又唔問，專係要選中我。我的結論是唔借咭給她，唔代表我唔係好人，反而見佢真的是一個壞心腸的人。
- Jul 27 Thu 2006 12:13
無奈
今日早上卓希爸話去飲早茶，咁我哋就一家人及芳ee一齊去九龍灣的酒樓。本來卓希已經開始想訓的，但係有得出街及玩，便乜嘢眼訓都唔記得哂，之後回家時，在停車場開始開車而還未到付款押口時，佢已經頂唔住，係車到訓咗啦！仲訓得好鬼“林”，最衰當時我哋無影相機，如果唔係就一定影佢個“林”樣嚟睇睇！
下午卓希和爸爸過去探爺爺，回來後又讓著要出街，咁我便帶他落樓下找他爸爸(卓希爸去剪頭髮)，行了一會兒後便回家食粥粥。無幾耐翠雯姐姐便來我們家，今晚芳ee煮泰國餸，咁我哋咪一齊試吓佢的手勢啦！有很多香港人都好鐘意飲的“冬陰公湯”、“抄通菜”和“青咖哩雞”，所以嘢初初食落口都唔覺得點，但後來食食吓先覺得d火出緊嚟。
今晚卓希和翠雯玩得好開心，有時卓希又會走去翠雯到“聊”佢，有時大家又搶奶樽。所以今晚卓希爸和我係休息時間，唔使吓吓都要social個仔，有人可以同佢玩係我哋一大樂事！
不過仲有兩天我就要考試了，個人越讀就越覺得很無奈，個考試範圍很大，大到所有的材料都沒有時間去睇，就算睇咗都只係過眼雲煙，完全係記唔到入腦的。尤其是那些文學的乜派物派，佢哋的內容和分別就真的令到人都頭痛，最煩的是連毛主席的說話都有文學的意義。已經唔係好分得清佢哋的分別啦，有時仲要比較兩者之間的差別。真的唔想讀下去，越讀個心就越跳得急同快，真的有壓力同緊張。求天父給我力量及平安！
耶和華開了瞎子的眼睛；耶和華扶起被壓下的人。耶和華喜愛義人。
詩篇146：8
- Jul 26 Wed 2006 12:17
真正開始放假啦！
今天終於可以真正的放假了。咁我做了甚麼呢？答案係乜都無做，卓希一訓覺，我就乘機一齊訓，所以今早芳ee到來後，交了卓希給她，我便去休息，希望多睡多一點時間，點知四十五分鐘後芳ee就抱住sleep咗的卓希入房找我們，就係咁，一家三口又再訓啦，卓希爸就九點多便起身，我同卓希就大覺訓到十點幾才起身。
下午我們便帶芳ee同卓希去九龍城，去九龍城做乜，當然就係玩bb專用的千鞦，卓希玩得好開心，然後仲週圍走，完全係要用哂佢的精力為止。然後我們便去九龍城泰國店買材料，因為芳ee話明天會煮泰國菜給我們吃！
返到屋企，卓希仲係好鬼好精力咁週圍走，不過佢亞媽我俾了一塊餅佢後，佢真的很疲倦，上到大人床後，唔使一分鐘就訓著。咁我就梗係一齊訓啦，所以今日我的休息真的很充足，不過唔知係咪天氣唔好，個人都好攰咁！好！今個暑期我要好好的休息一吓！
- Jul 25 Tue 2006 12:18
教仔
今天一大早便遇上大問題，因前些日子，正是熱潮的世界杯，卓希爸一早起身便會開電視睇新聞的入球。所以小卓希可以話係已經習慣咗一起身便要開電視(佢亞媽我好無奈)，今天一早起身佢又要求開電視(我哋現在通常只是開晨早新聞給他，他很快便沒有興趣後便關電視)，咁我都要作出我的要求，要佢執玩具(近來我們正在教他執玩具，要有手尾)。卓希行去玩具區只執了兩件玩具便又扭開電視，咁佢亞媽我就唔會咁輕易放棄的，一定要他執玩具後才可以開電視。他就係咁咸，係咁咸，我都唔理佢(通常d亞媽比較心硬)，卓希爸就係咁又抱佢，又dum佢，越理佢就咸得越大聲。我就同卓希爸講唔好理佢啦，卓希爸的耐性只係可以忍到兩分鐘，然後又想同卓希講數。剛巧這個時間芳ee就嚟搶抱卓希，卓希見又有人理自己，哭聲仲大，芳ee居然想用奶咀，立刻俾我阻止，佢做錯，點可以用另一樣嘢同佢交換？？？
我見這樣，本來係睇緊報紙的我便抱了卓希入房，關上門，由得他自己哭，正當他開始收聲時，因為哭得太多，d nose 水倒流，形成啖，他便咳了幾聲又嘔了。卓希爸見咁的情況，唔理我的反對就係咁dum個仔，後來卓希就真的收聲及係爸爸的懷抱裏睡著了。但係事後我也有同卓希爸話，唔可以咁容易便dum佢，而且係有眼睇的，越dum佢就哭得越大聲，但係d男人就係唔聽女人話，我唔理，日後個仔唔聽佢話，佢真的自食其果！
早上開完會後，我便回家接芳ee同卓希返心光，唔係做嘢，係我可以放假啦。今個下午開始我真的可以開始放假啦，第一件事要做的，便是帶卓希返心光的泳池游水。嘩！成個泳池得我哋兩母子游咋，直頭係“爽”。卓希在雙腳不能點地的情況下是有點怕，但在泳池邊的樓梯時便很開心的週圍走同踢水。玩了大約一小時，便回家了，游完水後的卓希都肚餓啦，回家食粥食得好快，完全無扭計。
另一樣令我困擾的是和芳ee的溝通，I try to be nice to her，直頭當她是一家人，去書展拿了很多東西回來都給了她很多，食乜嘢都有預她的一份。但有時真的頂唔順佢縱卓希，而且問她問題時，她不是答我所想要的。例如今天在車子裏時，我問她後座是否很熱，其實只是一條很容易的問題，她的答案是：嗯！都涼唔到，都唔係幾涼。
我直頭想c，答我好熱咪得囉，點解會這樣的答覆呢？又，在食粥前時常會在卓希面前評論我俾d乜嘢個仔食，但係食完粥後，到大人食飯，就所有嘢都給卓希食，仲係食到唔停嘴。我話唔准再食，佢就同我個仔話：唔係好飽係咪？仲想食多d係咪？媽媽唔俾食係咪？
我個仔的肚皮已經好大，我好怕有一日他食太多嘢會引致“爆肚”，婆婆(mormor)成日話我唔好俾咁多嘢佢食，其實嗰個人唔係我，我係阻止嗰個。個仔係我的，我都唔會餓親佢，但係食嘢真的要適可而止。
我直頭想c，答我好熱咪得囉，點解會這樣的答覆呢？又，在食粥前時常會在卓希面前評論我俾d乜嘢個仔食，但係食完粥後，到大人食飯，就所有嘢都給卓希食，仲係食到唔停嘴。我話唔准再食，佢就同我個仔話：唔係好飽係咪？仲想食多d係咪？媽媽唔俾食係咪？我個仔的肚皮已經好大，我好怕有一日他食太多嘢會引致“爆肚”，婆婆(mormor)成日話我唔好俾咁多嘢佢食，其實嗰個人唔係我，我係阻止嗰個。個仔係我的，我都唔會餓親佢，但係食嘢真的要適可而止。- Jul 24 Mon 2006 12:20
書展的最後一天
原本今天是要外出開會的，但突然又唔使了，所以真的有些失落，因為唔使外出開會的話，便要返心光工作。但靈基一觸，要去書展睇睇有沒有新的材料給聖經科，便浩浩蕩蕩的帶著卓希和芳ee一早出發去會展。展覽場地開十時正，我們十時零三分便到達，剛剛好所有的書擋都開了。一去到便是兒童天地(我本來打算最後才去的，點知一出lift便是兒童天地)，一入去，便是disney的counter，個女仔熱情到不得了，又叫卓希抽獎，又話有遊戲給bb玩。但係我唔想佢sell我，所以便大大聲咁同卓希話：「你屋企都有一套，唔好攪人哋d嘢」，個sales一聽到我已經有了，便試探式的問係用邊套，好在我認得係綠色個套。又問好多有關成套嘢的問題，不過我有d識答又有d唔識答。但係以我的口才，又點會解唔到困，我話全部都係人哋送的，我乜都唔知，有得用就得。個sales姐姐幾現實，之前仲話有遊戲給卓希玩，之後就無咗人影啦，唉！咁貴，我點會買呀，連卓希的玩具，都係朋友係玩具公司到做，所有的版嚟的。我係惜咗個同事個套，然後copy咗之麻。我的心態係有得用就用，無得用就算，如果卓希自己有上進的心，點都會學得到，相反，唔想學的話，我有哂所有學英文的材料佢都唔會學到。
行咗都成三點，食得嘢返得屋企都成四點，所以真的同返工無分別。不過當我去到基督教那個corner時，真的有些失望，只有很多飾物，書的介紹不多，比起基督教書展真的少好多嘢，所以可以說是空手而回。
- Jul 23 Sun 2006 12:21
我又開始有少少作病
今日一起身，個喉嚨就已經有少少痛，但係都唔係點理佢，點知去到下午，個身仲有痛添，咁我就知道係開始作病，所以快快的食了兩粒必x痛，一小時後個人又真的不再太痛。唉！唔好啦，我就快就快可以真正放假啦，等我去完旅行先啦！
一早我和卓希兩母子返教會(佢爸爸係大懶蟲，成日都唔去，而且今天佢話要等卓希唔係屋企時，快快的預備明天補課用的筆記)，敎會今天係一年一度的暑期聖經班畢業典禮的崇拜，
我在想，到卓希大d後(最快係幼稚園高班)，我就可以給卓希返教會的暑期聖經班。跟著又諗，教會同屋企距離咁遠，咁咪又係我車佢去(如果到時我仲有車的話)。諗諗吓都唔使諗，心光成日都咁遲先可以放假，好似今年咁，到我預備開始可以放假時，暑期聖經班又完咗啦！以前我年年都想到教會幫手，同時可以訓練一吓教會的青年人做兒童的福音工作，不過年年我都未放假，所以唔使諗啦！
這個星期都有好多東西要想，有時會覺得我哋依個小家庭真的很無助，卓希爸話親人點親，又莫過於父母對自己的親與關心。其實這個道理我老早就知啦，不過近來真的很強烈。唉！爸爸媽媽又在瑞典，為何每次有事想要他們在我很近的身邊時，他們總是在瑞典的。不過我自己又係衰的，爸媽在香港時又怕佢地擔心同成日問住會煩，但係依家係瑞典時又好想佢哋係我身邊。所以呢，人總是不懂得珍惜在身邊的東西，要到你自己覺得無助時，又會想要。
卓希今天下午一連睡了兩小時四十五分鐘，很長的時間，因為早上返教會時，他只在車裏睡了十五分鐘，所以下午便訓咁長的時間。到晚上我便由得他八時半才上床(平時八時飲完奶便上床的)，不過見到佢都有少少訓唔著，係床到“look”來“look”去。但我沒有理會他，還把他和卓希爸分開，免得佢哋兩個掛住玩，就算卓希爸唔同佢玩，佢訓訓吓都會look過去卓希爸到攪他，所以分開他們為上策。等他一個人在自己的床仔look look吓便突然的訓著了。有時我會覺得他在床上look的動作很誇張，使唔使咁look法才睡得著呢？不過細心一想，我哋大人都一樣啦，雖然動作不是太大，但也會look一陣才訓得著。有時照顧小朋友，都要從他們的角度想和看的。(理論還理論，不過有時都唔記得)
- Jul 22 Sat 2006 12:26
孩子們的小圈子
今天早上都是休息加休息，卓希這兩天都唔係好肯食粥，真的不知是否在心光宿的火食太好味，返到屋企後對粥真的無乜興趣，所以也就在半玩半食的情況下完成每餐的食用。
下午我們一家去了hollywood plaza，為的是可以出外走走，而且也可以嘆免費的冷氣，我們在starxxxx坐下來。
飲到媽媽唔准再飲啦！
卓希係咁要食muffin同飲爸爸個杯cream朱古力味冰，
之後我同卓希抵受唔住睡魔的急call，兩母子就係咁係大庭廣眾下訓咗。
晚上卓希爸的舊生約了老師和學生去食飯，又只係得我同卓希兩人。本來我是想回柴灣探吓親人的，但柴灣親人們唔係約了人去書展，就係要返工，又或是病了。所以本來我們是在家的，但後來給我找到卓希的契媽，可以去同契哥及契妹玩！
一去到，真的不得了，原來契哥很喜歡同卓希玩，仲同卓希一起洗澡，話就話係洗澡，其實就係玩水。卓希都係第一次用浴缸洗澡，契哥仲同佢擦身添。契哥成晚都時不時偷鍚卓希，連卓希飲奶時，都要癡住，不過以下的相很有趣，契哥只是想和卓希一齊，而晴晴的目的便是卓希手上的奶！
走時契哥仲唔捨得我地走，不過唔走唔得，因為卓希已經好疲倦，而且走之前，仲攪契媽的cd，點知cd以無情力跌在他的腳子公上，所以疼了，
不過我覺得小朋友是要跌下，同小朋友一齊玩吓，搶吓嘢才學會長大。正如我今天和一位bk媽媽傾電話時說，每個星期咁辛苦都要帶卓希去playgroup的原因是想他學會與他人相處，尤其是他直到現在都是獨生子，在家時可以隨手便拿到他要的玩具。但與其他小朋友玩時，便要學習禮讓。就正如今晚他和契哥玩耍時，我真的見到他的進步，是能與他人分享玩具，及契哥話唔得時，卓希識得立刻停手(以往他只會搶)。
- Jul 21 Fri 2006 12:28
頭痛日
嘩！個頭痛到爆，由日頭痛到晚黑，係少少的咁痛法。晚上返學後真的頂唔順，便自己提早回家，點知一返到屋企，卓希仲未訓，個時已經成八時四十五分，依兩父子近來成日都作反，我話過如果個仔有乜唔聽爸爸話，我唔會出手相救的，因為我要卓希爸知道太過就卓希的話，係會唔聽佢話。不過好多時卓希爸為了鍚個仔，就乜都得，而我就會堅持，然後要個仔鍚返我，佢知道咁忟係唔得時，我才會幫佢想吓辦法的！
唔得！頭好痛，要去休息吓！
(今天去了律師樓到簽約啦，真的十五又十六！)
- Jul 20 Thu 2006 12:36
需要休息
也許之前我博殺得緊要，今天個人開始放鬆後，成日都好眼訓。一有機會俾我達落張床到時，次次都訓得著，仲係可以唔使起身個隻。今天都算熱，下午我真的太疲倦時，在睡房一達落床時又睡著了，但係連冷氣同窗都無開個隻，可想言之我真的很疲倦。
雖然個人開始放鬆，但也用三人會議來開會，原理是大約三個人家裏有電話會議的功能後，就可以像我們今天一樣的，有幾個人同一時間係電話到開會。來來回回的幾個電話，我幾時才可以真正的放得假呢？明天還是有一大堆問題要處理，唉！我想要自由，我想放假呀！
- Jul 19 Wed 2006 12:38
嬲
今天我只能說我得兩個字來形容，“忙”同“嬲”。今天又係開會天，然後大家都忙著做周年報告書，又要做進度表的評估，仲要做來年的科計劃。忙到做完後，要寄給校務主任時唔記得咗attach，又要重新send過。
嬲，當然就係嬲卓希爸啦！早上我先係小吉媽到留言叫佢唔好嬲佢老公，點知下午就輪到我嬲我老公。是否所有的男人都是一樣，所以嘢都係指意女人做，做都唔緊要，但係佢哋的用詞與評價就真的很傷女人心。對我來說，做唔緊要，邊個有時間就要“分擔”一下，但係如果為了和朋友去玩，而唔幫忙的話，我就真的不能接受。我如果自己能做到的話，都唔使你幫啦，但係我真的要返工，係做緊正經嘢，咁都會唔肯，件事最衰係佢提出的，與我無關！唔講！
我同媽媽傾電話，點知對方就以為我對個仔專制，一定要食粥仔，我真的唔知從何入手講近來發生在我身上的事情，所以選擇唔出聲。聽完電話入房自閉，我的感覺是自己很無用，讀書又半天吊，每學期只能修得一科，生咗亞仔出嚟，又無乜時間陪佢，更唔使講做全職媽媽，工作又一大堆嘢等著我一個人去處理，我唔係唔想同人講，而係唔知點講。只好在禱告中交托！
今天的信徒箴言：
夏甲就稱那對她說話的耶和華，為「看顧人的神」，因而說：「在這裏，我也看見那看顧我的嗎？」
創世記16：13
你們不要求吃甚麼，喝甚麼，也不要掛心， 這都是外邦人所求的。你們必須用這些東西，你們的父是知道的。
路加福音12：19-30
本來今晚我的同事找我一齊有飯局，佢哋叫過好多次，我今天真的好想去，但基於我對我個仔的責任及照顧，便沒有去了。
- Jul 18 Tue 2006 12:42
開會日
今日真的是開會日，早上八點半已經要開自己的科會，然後十點半開夏令營的儉討會，跟著我又請青年團團職食pizza，佢地的食量驚人，好彩我只係訂得兩個大pizza，如果唔係真的會食窮我！兩點鐘又開始開校務會議，連續兩成兩個多小時(其實去到最後有三part都唔需要咁長時間，因為係一個無效率的人負責，都無人聽，人人都係到傾計)。四時多便可以回家了，本來是想獨自去德福買麵包，但細想卓希成日都無出過去，便回家，著芳ee餵卓希食粥(今天無乜胃口食粥)。跟著我便帶卓希去德福，meet咗卓希爸後便一家行一會兒，然後買麵包便回家去。
卓希今日成日都比較扭計，今晚唔使十分鐘便訓咗，我話係因為係屋企的，活動的範圍細，而且去咗四日宿營，個人都攰啦，大人都攰，細路又點會唔攰呢？
我呀！仲有一樣唔開心的事情，話說卓希爸帶學生去大陸時，我拿了平時帶去大陸的萬能插蘇給他，因為大陸是有插制係平腳(平行)或平腳(八字)，咁我找了很長的時間，才給我找到這個兩用的萬能插蘇。點知，點知，卓希爸借給一個學生，咁個學生係走時放在行李箱裏，話遲些才還給卓希爸。但今天卓希爸回樓補課時，那學生告訴他唔見了。唉！個萬能插蘇係好平好平的東西，但我真的用了很長的時間來找一個兩用的！
- Jul 17 Mon 2006 12:45
夏令營的最後一天！
今天真的很忙，一天清早卓希起床起都沒有扭食奶，只是在我身旁走圍look，然後又起身睇車車，不過芳ee一見佢起身就都起身，開奶給他吃。
一個早上真的沒有時間停下來，就連卓希有時想要我抱，我也沒有時間。因為早上有個聚會是由我負責，跟著又係閉營禮、收拾場地、和導師開儉討會等的時候。卓希今日就比較聽話，只是眼訓時又扭少少。到所有導師都走了後，我又是忙收拾自己和卓希的行李(不過都係有一兩樣留咗係心光)。趕著四點可以走人，因為想五點前把車拿到車房去。前一天的晚上，香港落很大雨，一小時內有黃雨、紅雨及黑雨。而咁唔好彩我的車子就泊在心光的停車場(那裏有少少暗斜)，令到有大量的水沿著斜路流落停車場，我的車就在這個情況下水浸了(是凌晨三、四點左右)。幸好只是在司機位的地毯，乘客位都有少少濕，但沒有司機位那麼多。所我便想拿車去車房，蒸一蒸裏面加消毒，如果唔係會發臭的。好彩我拿去得著時，剛剛好仲可以接order。
返到屋企，我成個日都散哂，乜都唔想做，只是坐在sofa邊休息休息。連平時我會爭著落街買餸我都沒有落，只好讓芳ee去做。晚上沒有在家做飯，因為回到家後真的很晏了，又未買餸，我們便一起落百樂食飯，自然，卓希又係食到成枱、成身、成地都係飯。
好！等我整理吓卓希的短片先！
- Jul 16 Sun 2006 12:46
夏令營的第三天！
今早卓希訓得好好，成六點五十分才醒，然後飲奶。如果不是每天有兩個人咁輪流睇住佢，只得我一個的話，都唔知做得邊樣？七點十分，我便帶著卓希巡樓，順便叫哥哥姐姐們起身。他們離遠一聽到卓希的“吱吱”拖鞋，就知道我嚟緊，跟本不用多費口水叫佢地。
今年夏令營的崇拜，我們決定到咐近的田灣宣道會華基堂到參加，陳太一早幫我們安排了座位及點字的程序，卓希爸和我便帶著卓希到育嬰室，那裏有一個電視，可以睇到下面崇拜的情況。而卓希又可以同其他的小朋友一起玩，今日大約都有大約八個小朋友，卓希爸和我都發覺所有的小朋友都不怎的說話，大都是指指點點，也許真的男仔比較遲講嘢。
下午每組的同學們會同導師去香港不同的地方，買一樣當地的特色小食。我們一家人便去香港仔食謝記魚蛋粉，卓希差不多食哂一碗粉。跟著卓希很快的九秒九便訓著，我和卓希爸回心光後，便一家人稍事休息，兩小時後，卓希爸突然話“佢柯咗大”，咁我又要起身處理佢d大啦。
仲有成個下午流流長，咁做乜好呢？我靈機一觸，諗到可以帶卓希去感知肌能室到玩。嘩！佢玩得不知幾開心，足足玩了一小時。(有短片，又係要等到返屋企先有得睇)
跟著我打算介紹卓希爸同卓希去康樂室玩，但礙於卓希爸懶，便沒有玩了。然後我們一家便去了聚會的地方，那裏有電子琴和一套豉，卓希之前係聚會時已經牛咁眼望住套鼓，因為佢以為就咁係咁打，咁我咪同佢一齊坐係套鼓旁，好好笑！佢係咁打，真的有板有眼，又係要遲d才會有得睇。但係卓希對彈電子琴的興趣就不大，只係喜歡打鼓，那也能滿足他經常扣打的行為。
卓希爸在五點多便回家，然後我們便享用晚飯，今晚心光食雞翼，我和芳ee初初只是拆d雞肉給他吃，食到後來，他要自己拿著吃，仲可以係食到拆骨，唔願放手嗰隻(不過都只係食咗一隻雞翼)。我在晚飯時才同芳ee講，返到屋企都唔知點算，卓希食飯真的會如臨大敵。
晚上的節目是音樂茶座，小卓希好想同d哥哥姐姐一齊玩耐d，不過佢亞媽我就唔准佢咁做，因為怕佢明天會唔夠訓，唔夠訓就會扭計，不時就麻煩的了。
好嘢！明天返屋企，我要大覺訓！
- Jul 15 Sat 2006 12:48
夏令營的第二天！
一早，卓希六點十五分已醒了，食完奶之後便在這間很大的房間裏遊蕩，芳ee負責睇住佢(好彩有幫助，如果唔係，我會c的)。他一早起身已活力充沛的走圍走，我也由得他，好使他用吓energy。在食早餐的時候，卓希爸來了，為的是要帶卓希去尖沙咀的playgroup(上星期病了沒有去，今個星期一定要去)。當廖太ee給他一個難開的盒時，卓希第一時間便去找爸爸，跟著廖太ee話卓希太倚賴，我就話係卓希爸太就佢，所以一有困難時，佢就去找爸爸，希望得到解決。
跟著芳ee便和卓希搭970回心光，卓希爸回家做了少少家務便到心光。所以下午我們便不顧卓希爸的反對(佢都唔係到，過咗海就神仙)，去了和大姐姐哥哥們一起游水。
起初卓希落水後都有少少扭計，但後來他見潑水到媽媽處很得意後，便係咁拍水，很德意！不過由於天氣涼的原故，他只游了十分鐘便上水，一上水仲要望住個游水池，又大聲咁指住d水，擺明就係仲想係水到玩，不過我怕他會再病，所以上水後立刻用熱暖水同佢洗澡。游完水後仲可以訓下什覺添(因為用力玩水，太攰啦)
晚飯時卓希爸幫我拍了些卓希自己食粥的短片，又要返到屋企後才可以剪片啦！不過今晚晚飯後，我就同飯堂英姐話“唔好意思，我個仔食嘢食到咁”，佢就話“唔緊要，細路仔食嘢係咁的啦”。哈！我都係等佢依一句咋！
今晚芳ee要返屋企，卓希爸來幫我睇住卓希，芳ee走後，卓希同爸爸玩了一段時間都訓啦！好嘢！我今晚自己訓，希望可以有好的休息啦！
今年的夏令營請了梁永善牧師來和我們分享，雖然他講的都是信仰基本的知識，但連對我自己都係一個好好的反醒機會，人真的要不斷的反醒及改進，才能迎合新的挑戰！
- Jul 14 Fri 2006 12:49
夏令營的第一天！
今天是心光的畢業典禮，一早起身，便立刻自己裝身先，然後便幫卓希換衣服同作最後的收捨。七點便起程，返到心光後，卓希好似一個小明星似的，人人都想抱佢，點知佢就好似小鳥依人咁要我抱(其實我的心很甜的，他以前不癡我的)。不過都我要工作時，芳ee便陪伴他走圍去玩，又去it房同d it哥哥們玩，又去女仔房巡視(八掛到不得了)。
今晚食飯時，卓希有很大的特突，平時給他一湯匙時，他只係作破壞，但今晚他真的開始自己用湯匙拿食物，仲係真的放入口個，似模似樣，我今晚就由得佢啦，因為係學校，整污槽都唔係我清潔，而且佢又玩得開心，我又食得放心，所以佢今晚係有三份一自己食，三份一的一半係自己的肚，另一半係係枱面或地下！但他真的好enjoy，希望佢可以快些學到自己食啦！
今日影了些卓希踢足球的影片，不過要回到家後才可以剪片！
- Jul 13 Thu 2006 12:49
無壓力的一天
今天對我來說，是全年最無壓力的一天，因為：一、可以返晏d(不過都一早被卓希“倒塔”咁早叫起身)，二、因為試後活動的原故，所以沒有堂上，三、沒有崇拜及晚禱，昨天是今年的最後一次晚禱，每年的今天都沒有崇拜，因為彩排的時間很長，然後學生們要趕著沖涼，跟著就係晚上最佳宿生的彩排，他們的時間真的很緊迫。每年的這一天，會有很多人來借學生於崇拜時間做最後的衝刺，能坐在禮堂的人數真的會好少，所以在唔想和別的部門爭人的情況下，我會取消崇拜，等學生們可以作最好的準備。
今晚是宿舍部的最佳宿生晚會，坐在飯堂時，個人真的不能留心，因為真的很熱，汗是由頭流到背脊骨的。我參加了那麼多年，今年是最熱及辛苦的一年，但又唔可以走開，因為只得我一個職員，又有兩個超麻煩的學生坐在我身旁。不過去到七時三十分時我真的頂唔順，要走人了，幸好這個時候另一位職員返回我們這圍，令我得可以走人。
很期待明天夏令營的開始，但也有些怕自己顧唔惦卓希及學生，因為星期六晚芳ee將會走，到星期一早上才再來，所以真的有點擔心。另一樣擔心的事情便是天氣，天文台說在週未會下大雨，但我們plan好星期六係游水，星期日係整整出街的，所以今天在想如有突發事情出現的話，要點樣改變那些行程呢？嗯！等我慢慢諗，再唔係明天晚上先同其他導師商量！
爸爸(morfar)今天回港，他去了另一個地方授課(唔記得邊到，總之平安返到嚟)，他一落機會打電話給我，今家想約個時間見見面，但原來係無時間，因為他星期一早上又飛返瑞典啦。但係我們星期一下什才出營，所以爸爸今天晚上便來了我們家吃飯及看卓希。依個卓希，有morfar係到，就連爸爸媽媽都唔要，差點仲要跟morfar去街街添，俾佢笑c！
- Jul 12 Wed 2006 12:50
卓希好好多啦！
嘩！香薰勁，香薰惦，香薰無得頂。話說昨天晚上我幫卓希在他的手上、肚仔搽了香薰後，一、他昨天晚上只係醒過一次要飲水，無因為肚仔痛而醒。二、被嘢咬到的患處完全平哂，無腫啦！三、我在房內滴了驅蚊的香薰，所以昨天晚上我哋三人都睡得好好。
不過我都和卓希爸諗緊買唔買一種特別的水療吸塵機，可以連窗簾啦，床舖都吸得，最重要係連d蛋及瘙蛋都吸到，唔使卓希成日俾嘢咬，佢咁細個，唔可以成日用香薰，尤其是佢亞媽我所用的香薰，全部都係超純的，所以短期治療就好，長期就唔好啦！但係依個吸塵機超貴，係過萬，所以哋仲諗緊，而且另一樣主要的問題係我哋兩公婆都有鼻感，所以以現在的情況來看，卓希有鼻敏感的機會都好大，有一個好的吸塵機的話，就可以減少個發病率。唉！睇吓點先啦，太過貴啦！
今日d工作忙到不得了，所有工作程序都好似癲倒哂一樣，不過出其在午飯時可以和卓希的契媽及幾個學生在禮堂研究結他。卓希的契媽係咁叫我同學生夾歌，但係我真的很久沒有玩過，怕甚麼都會忘記，係學生面前真的會好瘀(做老師的通病)，我連琴都唔敢係佢哋面前到彈，又點會彈結他。記得初初到心光時，心口掛著個“勇”字，所以自己識的樂器都會同學生一起玩，又試過同學生兩個一起夾琴(通常我只識彈主音，佢哋彈和音，好好玩的)，不過真的好耐都無練過，所以真的唔想今日同他們夾。也許他日我“的”起心肝再練後，會和他們夾夾的！
今晚團契的惜別會，學生們預備得很充足，大家都玩得很開心，連院長都同我哋玩埋一份(近來他的心情好似好好咁)，今晚仲聽到院長的歌喉，可想言之d學生今晚係玩得好“盡”。希望院長唔會怪我這個宗教主任啦！
- Jul 11 Tue 2006 12:51
耳聽八方！
多人給不同意見係好，但有時會令到自己好迷茫，因為阿A的意見又實際，阿B的意見又有多D JETSO，阿C的意見又全面，所以令到個人真的比較亂。但細心一想，九月才交尾數，為何那麼急呢，便打電話給卓希爸，他說大約八月中到找到銀行便可以的了。車...........................................等我成個傻婆咁週圍找資料，等到暑假時就輪到我老點個衰佬公做先！(老點到先算，我比較係心急嗰個，未等到他有所行動我已經做完哂所有嘢)
卓希的玫瑰疹好好多啦，D紅色的粒粒都退哂，不過我都會要佢沖多兩日莞茜水，確保D毒素盡量迫出嚟。不過他還是有鼻水，同鼻水倒流的情況，昨天晚上開始食佢契媽介紹的橙味化啖素。要等多兩日先至知有沒有幫助。
不過一波未平，一波又起，昨天晚上睡覺時，唔知俾乜嘢咬到隻手仔紅到一大舊咁，佢亞媽我肉都痛。而且佢就了卓希爸的唔好處，就係俾嘢咬後，要好多日先會散，兩仔爺都係咁多毒素係身！
唉！晚上放工回家仲發現連手指位都有，真的唔知俾乜嘢咬？所以我決定今晚會整d香薰係屋到，免得佢又俾嘢咬！
唔知係咪卓希的腸胃仲未完全好返呢？因為佢係咁放屁，唔係普通的屁，係嗅到我都頂唔順的屁。真的好嗅，而且成日扭計，所以我便用拿手的香薰同他搽個肚仔。嘩！有效到不得了，搽完之後好快就係咁放嗅屁，嗅到我同卓希爸都彈開，阿仔望一望我哋，又再玩他的玩具。到我都要睡覺時，再幫他搽多一次，d屁就少咗，不過都係勁嗅！
廚藝“棒” (5)
